नाइजेरियामा बोको हरामबाट अपहरित ३०० स्कुले बालबालिकाको सकुशल उद्धार
नाइजेरिया: नाइजेरियाको एक स्कुलबाट अपहरणमा परेका ३ सय भन्दा धेरै बालबालिकाको सकुशल उद्धार गरिएको छ ।
उत्तर पश्चिम क्षेत्रस्थित कातसिना सहरमा रहेको स्कुलबाट गत साता अपहरणमा परेका ३ सय ४४ विद्यार्थीको शुक्रबार उद्धार गरिएको हो । उनीहरु ब्ल्यांकेट बोकेर खाली खुट्टा पैदल हिँडेर घर फर्कँदै गरेको दृश्य स्थानीय टेलिभिजनले देखाएका छन् ।
थकित र दुखी मुद्रामा देखिए पनि उनीहरु सकुशल रहेको बताइएको छ । तर तीमध्ये एक बालकको अनुहारमा माटो लतपतिएको देखिएको छ । अपहरणमा परेका सबै बालक हुन् । उद्धारपछि उनीहरुका अभिभावकहरुले खुसी व्यक्त गरेका छन् ।
गत साता सशस्त्र समूह बोको हरामका लडाकुले उनीहरुलाई स्कुलबाट अपहरण गरी रुगु जंगलतर्फ लगेको थियो । सुरुमा कुनै समूहले अपहरणको जिम्मेवारी नलिए पनि तीन दिनपछि बोको हराम समूहले अपहरणको जिम्मेवारी लिएको थियो ।
यसअघि २०१४ मा २७० स्कुले बालिकाहरुलाई पनि यसै गरी बोको हराम समूहले अपहरण गरेको थियो । उनीहरुमध्ये आधा जसो मात्रै केही वर्षपछि रिहा भएका थिए । केहीले लडाकूहरुसँगै विवाह गरे भने केहीको मृत्यु भएको आंकलन गरिएको थियो। स्कुले विद्यार्थीहरुलाई अपहरण गर्ने र जिहादी लडाकुको रुपमा तयार बनाउने बोको हराम समूहको इतिहास छ ।