स्लोभाकियाका प्रधानमन्त्री, उपप्रधानमन्त्रीसहित उच्च अधिकारीहरु कोरोना संक्रमित
स्लोभाकिया: स्लोभाकियाका प्रधानमन्त्री इगोर माटोभिकसहित उपप्रधानमन्त्री, रक्षामन्त्री र अरु केही उच्च अधिकारीहरु कोरोनाभाइरसबाट सङ्क्रमित भएका छन् ।
प्रधानमन्त्री इगोरले शुक्रबार आफू संक्रमित भएको जानकारी दिएका हुन् । ब्रसेल्समा भएको युरोपेली संघको सम्मेलनमा सहभागी भएको एक सातापछि उनी सङ्क्रमित भएका हुन् ।
उक्त सम्मेलनमा फ्रान्सका राष्ट्रपति एम्यानुएल म्याक्रोँ पनि सहभागी थिए । र उनी केही दिनअघि नै सङ्क्रमित भइसकेका छन् । इगोरले सामाजिक सञ्जालमा समेत आफू संक्रमित भएको कुरा लेखेका छन् । संक्रमणका कारण आफ्नो योजना पूरा हुन कठिन अवस्था देखिएको भन्दै चिन्ता व्यक्त गरेका छन् ।
इगोरसँगै उपप्रधानमन्त्री भेरोनिक रेमिसोभ, रक्षामन्त्री जारोस्लाभ नाडल्टर र अरु केही उच्च अधिकारीहरु पनि संक्रमित भएका छन् । स्लोभाकियामा कोरोनाभाइरसबाट हालसम्म झण्डै डेढलाख मानिस सङ्क्रमित भएका छन् । साथै एक हजार ४ सय भन्दा बढीको मृत्यु भइसकेको छ ।