काठमाडौं : कांग्रेसले प्रतिनिधिसभा विघटनको कदमको विरोध गर्दै पुस १३ गते सोमबार प्रदर्शन गर्ने भएको छ। केन्द्रीय कार्यसमितिको बिहीबारको बैठक १ सय ६५ संघीय निर्वाचन क्षेत्रमा एकसाथ प्रदर्शन गर्ने निर्णय गरेको हो।
बिहीबार बैठकअघि वरिष्ठ नेता रामचन्द्र पौडेल पक्षको भेलाले तत्काल विरोधका कार्यक्रम ल्याउन नेतृत्वलाई दबाब दिने निर्णय गरेको थियो। मंगलबारदेखि दिनहुँ बैठक बसिरहे पनि विरोधका कार्यक्रम गर्ने कि नगर्ने भन्नेमा कांग्रेसमा दुई धार देखिएको थियो।
बिहीबारको बैठकमा पूर्वमहामन्त्री प्रकाशमान सिंहले सरकारको कदमविरुद्ध सडक संघर्षमा जान ढिलाइ गरेकोमा नेतृत्वको आलोचना गरेका थिए। ‘सरकारको कदमविरुद्ध तत्काल पार्टीले विरोधका कार्यक्रम ल्याउनुपर्छ’, नेता सिंहले भने, ‘असंवैधानिक रूपमा संसद् विघटन भएकाले पार्टीले आन्दोलनमा जान ढिलाइ गर्नुहुन्न।’
उपसभापति विमलेन्द्र निधिले प्रतिनिधिसभाको अपरिहार्यतामा जोड दिएका थिए। तर, निधिले सडक संघर्षबाट प्रतिनिधिसभा पुनःस्थापनाको सम्भावना भने न्यून रहेको धारणा व्यक्त गरेका थिए। करिब सवा घण्टा बोलेका निधिले तीन विकल्प सुझाएका थिए। ‘कुनै पनि हालतमा संसद् चाहिन्छ। संसद् भएन भने मुलुकमा लोकतन्त्र रहन सक्दैन’, उनले भने, ‘यसका लागि सडक आन्दोलनबाट संसद्को पुनःस्थापना, दोस्रो निर्वाचनबाट संसद् र तेस्रो सर्वाेच्च अदालतको फैसला।’
उनले ०६२/६३ सालको जनआन्दोलनमा राष्ट्रिय अन्तर्राष्ट्रिय परिवेश फरक रहेको उल्लेख गर्दै अहिले सडकबाट पुनःस्थापनाको सम्भावनालाई इन्कार गरे। उनले भने, ‘अब सर्वाेच्च अदालतको फैसला कुरौं। अदालतले सरकारको कदमलाई बदर गरे स्वागत गरौं। नत्र निर्वाचनको सुनिश्चितता गरौं।’
पूर्वसहमहामन्त्री अर्जुननरसिंह केसीले सरकारको कदमविरुद्ध उभिनुपर्ने समय आएको बताए। ‘लोकतन्त्र र संविधान रक्षाका लागि आन्दोलनमा जानुपर्छ। र, आन्दोलनलाई चुनावको तयारीको रूपमा अगाडि बढाउनुपर्छ’, केसीले भने। उनले आन्दोलनसँगै निर्वाचनको तयारीमा पनि सँगै अगाडि बढ्नुपर्ने धारणा व्यक्त गरे।
उनले पछिल्लो घटनाक्रमले पार्टीको महाधिवेशन प्रभावित हुन सक्ने आशंका गरे। उनले अघिल्लो महाधिवेशनकै महाधिवेशन प्रतिनिधिबाट फागुनमै विशेष महाधिवेशन गर्नुपर्ने प्रस्ताव गरे। ‘एकातिर सरकारविरुद्ध संघर्षमा जानु छ भने अर्काेतिर पार्टीको महाधिवेशन गर्नुपर्ने पनि बाध्यता हामीलाई छ,’ उनले भने, यसका लागि १३औं महाधिवेशनकै प्रतिनिधिबाटै महाधिवेशन गराऔं। त्यो तदर्थ अधिवेशन हुन्छ। यसको एक÷दुई वर्षपछि नियमित महाधिवेशन गरौं।’
केसीले विशेष महाधिवेशन प्रस्ताव गर्दा देउवा झोक्किएका थिए। ‘फागुनमै महाधिवेशन हुन्छ, फागुनमै हुन्छ’, देउवाले भने।
बैठकमा तीन दिनसम्म जम्मा ११ जना केन्द्रीय सदस्यले बोलेका छन्। पहिलो दिन वरिष्ठ नेता पौडेलसहित चार नेताले सरकारको कदम र कांग्रेसको आगामी रणनीतिबारे धारणा राखेका थिए। दोस्रो दिन बुधबार पनि चार जनाले मात्रै बोले। बिहीबार जम्मा तीन नेताले मात्रै धारणा राखेको कांग्रेसले जनाएको छ। पार्टीका मुख्यसचिव कृष्णप्रसाद पौडेलका अनुसार बैठकमा बोल्न नाम टिपाएका नेताको संख्या २५ भन्दा बढी छ।
केन्द्रीय सदस्य डा. डिला संग्रौलाले सुरुकै दिन नाम टिपाए पनि अझै आफ्नो बोल्ने पालो नआएको बताइन्। ‘मैले त सुरुकै दिनमा नाम टिपाएको हो। तीन दिन भइसक्यो बोल्न पाएको छैन’, संग्रौलाले भनिन्, ‘दिनमा तीन–चार जना नेता मात्रै बोलिरहेका छन्। यही हिसाबले बैठक अझै लम्बिन सक्छ।’
प्रतिक्रिया दिनुहोस !
