विराटनगर : नेपाल–भारत सीमा क्षेत्रबाट उदयपुर घर भएका दुई युवालाई लागुऔषधसहित प्रहरीले बुधबार साँझ पक्राउ नियन्त्रणमा लिएको छ । प्रहरीले पक्राउ गरेकामा उदयपुरको त्रियुगा नगरपालिका–२ का २१ वर्षीय सुरेन्द्र बस्नेत र १९ वर्षीय अनिष अधिकारी रहेका छन् ।
उनीहरुलाई विराटनगर महानगरपालिका–१७ मटेरुवाबाट पक्राउ गरिएको इलाका प्रहरी कार्यालय रानीका प्रहरी निरीक्षक दीपक थापाले बताए । उनका अनुसार भारतबाट लागुऔषध बोकेर फर्कदै गरेको अवस्थामा उनीहरुलाई नेपाल र सशस्त्र प्रहरीको संयुक्त टोलीले नियन्त्रणमा लिएको हो ।
शंकास्पद रुपमा भारततिरबाट आउँदै गरेका दुवैजनालाई रोकेर चेकजाँच गर्दा साथबाट लागुऔषध फेला परेका थियो । प्रहरीले उनीहरुको साथबाट एभिल, लुपिजेसिक र डाइजेल्याब गरेर तीन एम्पुल तथा एक सय पाँच ट्याब्लेट नाइट्राभेट बरामद गरेको छ । पक्राउ परेका बस्नेत र अधिकारीविरुद्ध लागुऔषध ऐन अन्तर्गतको मुद्दा चलाउन बिहीबार म्याद गरेर अनुसन्धान सुरु गरिने प्रहरीले जनाएको छ ।
प्रतिक्रिया दिनुहोस !
