नुवाकोट : नेपाल कम्युनिस्ट पार्टी (नेकपा)का स्थायी कमिटी सदस्य तथा संस्कृति, पर्यटन तथा नागरिक उड्डयनमन्त्री भानुभक्त ढकालले देशमा षडयन्त्रका कारण २०१७ सालकै मुद्दा दोहोरिएको बताएका छन् । मन्त्री ढकालले देशलाई अस्थिरतामा लैजाने षड्यन्त्रका कारण एक पक्षले २०१७ सालकै प्रकृतिको मुद्दा दोहोर्याएको बताएका छन् ।
नुवाकोटको सदरमुकाम बिदुरस्थित नेकपा पार्टी कार्यालयमा शनिबार संचारकर्मीसंगको भेटमा मन्त्री ढकालले प्रतिनिधिसभा विघटन सम्बिन्ध विषय सर्वोच्च अदालतमा विचाराधिन भएकाले सबैलाई सर्वोच्चको फैसला स्वीकार्य हुने बताए ।
मन्त्री ढकालले सरकार दृढ इच्छाशक्तिका साथ निर्वाचनको तयारीमा लागेको उल्लेख गर्दे प्रतिनिधिसभा पुर्नस्थापना भए बाँडिचुँडी खान पाइन्छ भन्ने सोच भएका पुर्नस्थापनको नाममा आन्दोलनमा उत्रिएको बताए । उनले नेकपा विभाजित भएको नभई पुनर्गठन प्रकृयामा अघि बढेको उल्लेख गर्दे पार्टी विधान अनुसार अध्यक्ष र महासचिवको परामर्शमा गरिएको पुनर्गठनलाई केन्द्रीय समितिले अनुमोदन गरिसकेकाले अब सम्पूर्ण पार्टीपंक्ति निर्वाचनमा होमिने स्पष्ट पारेका छन् ।
नुवाकोटको विदुरमा शनिवारै मन्त्रि ढकालले नेकपा विदुर नगरस्तरिय कार्यकर्ता भेलाकोसमेत उद्घाटन गरे । त्यस क्रममा उनले देशमा घोषित मितिमै चुनाव हुने दाबी गरे ।
प्रधानमन्त्रीलाई काम नै गर्न नदिएका कारण ताजा जनादेशमा जानुको विकल्प नभएको र जनतासँग डराउनेहरुले निर्वाचन हुँदैन भन्दै षडयन्त्र गरिरहेको मन्त्री ढकालको भनाइ छ ।
प्रतिक्रिया दिनुहोस !
