बैतडी : बैतडीमा सुदूरपश्चिम प्रदेश सरकारको सहयोगमा यो वर्ष १८ ओटा नयाँ विद्यालय भवन निर्माण हुने भएका छन्। सामाजिक विकास कार्यालय मार्फत १० ओटै स्थानीय तहका विभिन्न विद्यालयमा ४ कोठे र २ कोठे भवन निर्माण हुने सामाजिक विकास कार्यालय बैतडीका प्रमुख शंकरदत्त जोशीले जानकारी दिए।
चालु आर्थिक वर्षमा ९ ओटा चारकोठे, ९ ओटा दुई कोठे, एक पुस्तकालय भवन, ५ घेरबार, २ छात्रा शौचालय, ५ सूचना प्रविधि केन्द्र भवन र एक विद्यालय भवनको मर्मत गरिने जोशीले जानकारी दिए। नयाँ भवन निर्माणका लागि सम्बन्धित विद्यालयहरुसँग सम्झौता गरेर काम सुरु गरिसकेको जोशीले बताए। ४ कोठे भवनका लागि ४० लाख, २ कोठे भवनका लागि २० लाख, पुस्तकालय भवन निर्माणका लागि २० लाखका दरले बजेट विनियोजन भएको उनले बताए।
यस्तै घेरबार, छात्रा शौचालय निर्माण, मर्मत सम्भार र सूचना प्रविधि केन्द्र भवन निर्माणका लागि ५ लाखका दरले बजेट आएको जोशीले बताए। चारकोठे नयाँ भवन अन्तर्गत सुर्नया गाउँपालिका र पञ्चेश्वर गाउँपालिकामा २-२, डिलाशैनी, शिवनाथ,सिगास, पाटन र पुर्चौंडीमा १-१ भवन बन्नेछन्। यस्तै दुईकोठे नयाँ भवन अन्तर्गत मेलौलीमा २, पुर्चौंडीमा २, सुर्नयामा २, पञ्चेश्वर,डिलाशैनी र सिगासमा १-१ भवन बन्ने छन्।
यसैगरी २० लाखको लागतमा पाटनको उदयदेव मावि किम्तोलीमा पुस्तकालय भवन निर्माण हुनेछ भने दोगडाकेदार गाउँपालिकामा ३, डिलाशैनी र पाटनमा १-१ ओटा सूचना प्रविधि केन्द्र भवन निर्माण हुने सामाजिक विकास कार्यालयले जनाएको छ। यस्तै विद्यालयको घेरबारतर्फ दोगडाकेदार, दशरथचन्द नगरपालिका, सिगास, मेलौली र पुर्चौंडीका १-१ ओटा विद्यालय छनौट भएका छन्।
प्रतिक्रिया दिनुहोस !
