सिन्धुलीमा तीन दलले प्रतिनिधिसभा विघटनविरुद्ध संयुक्त संघर्ष गर्ने
पुष २१, २०७७ मंगलबार १५:२३:०
सिन्धुली : प्रतिनिधिसभा पुनःस्थापनाको माग गर्दै सिन्धुलीमा तीन दलले संयुक्त संघर्षका कार्यक्रम सार्वजनिक गरेका छन् ।
प्रधानमन्त्री केपी ओलीले प्रतिनिधिसभा विघटन गरेर असंवैधानीक कदम चालेको भन्दै नेकपा (प्रचण्ड–नेपाल) समूह, नेपाली कांग्रेस र जनता समाजवादी पार्टीले संयुक्त आन्दोलन गर्ने घोषणा गरेका हुन् ।
नेकपाका केन्द्रीय सदस्य तथा जिल्ला अध्यक्ष राजन दाहाल, नेपाली कांग्रेसका जिल्ला सभापति उज्ज्वलप्रसाद बराल र जनता समाजवादी पार्टीका सिन्धुली जिल्ला अध्यक्ष सुरदबहादुर स्याङ्तानबीच मंगलबार यस्तो सहमति भएको हो ।
प्रधानमन्त्री ओलीले अलोकतान्त्रिक, असंवैधानीक र गैर जिम्मेवारपूर्ण कदम चालेको निष्कर्ष निकाल्दै प्रतिगमन नसच्चिएसम्म संयुक्त रुपमा संघर्ष गर्ने सहमति भएको कांग्रेस सिन्धुलीका सभापति उज्ज्वलप्रसाद बरालले जनाए ।
सहमतिपछि संयुक्त विज्ञप्ति सार्वजनिक गर्दै आन्दोलनमा सहभागी हुन् र सहयोग गर्न आह्वान गरिएको छ ।
संयुक्त आन्दोलनका कार्यक्रम जिल्ला सदरमुकामदेखि वडास्तरसम्म चरणबद्ध गर्ने तयारी भइरहेको समेत नेकपाका जिल्ला अध्यक्ष राजन दाहालले बताए ।
प्रतिक्रिया दिनुहोस !
