राजविराज : ड्युटीमा खटिएका प्रहरीले रोक्न खोज्दा ठक्कर दिँदै फरार भएका मोटरसाइकल चालक थुनामा परेका छन् ।
असई हिमबहादुर खतिवडालाई ठक्कर दिँदै घाइते बनाएर फरार रहेका मोटरसाइकल चालक सिरहाको लहान नगरपालिका–१८ का ३४ वर्षीय डम्वरनारायण चौधरी पुर्पक्षका लागि थुनामा परेका हुन् ।
सप्तरीको सुरुङगा नगरपालिका–४ स्थित पूर्व–पश्चिम रागमार्गमा रहेको ट्राफिक प्रहरी पोष्ट कदमाहा कार्यरत असई खतिवडा मङ्सिर २१ गते विहान सवारी साधन चेकजाँच गरिरहेका थिए । असईले चेकजाँचका लागि चौधरी सवार स.७ प २५८० नम्बरको मोटरसाइकल रोक्न इशारा गरे ।
सवारी चालक अनुमति पत्र नभएका चौधरीले मोटरसाइकल रोक्नुको साटो तिब्र गतिमा मोटरसाइकल कुदाए । मोटरसाइकल रोक्न खोजेका असई खतिवडालाई ठक्कर लाग्यो । उनी लडेर घाइते भए, खुट्टा भाँचियो ।
फरार भएका चौधरीलाई प्रहरीले पक्राउ गरी सवारी अङ्गभङ्गमा मुद्दा चलायो । सप्तरी जिल्ला अदालतको आदेशले चौधरी पुर्पक्षका लागि राजविराज कारागारको थुनामा परेका छन् ।
दुर्घटनामा घाइते असइ खतिवडाको स्वास्थ्यमा सुधार भइरहेको इलाका प्रहरी कार्यालय, कडरबोनाका इन्स्पेक्टर बिरेन्द्र पासवानले बताए ।
प्रतिक्रिया दिनुहोस !
