सरकारविरोधी प्रदर्शनमा तरुण दलका कार्यकर्ताहरुबीच नै झडप, ६ घाइते

इटहरी: सरकारविरोधी आन्दोलनको क्रममा रहेको नेपाली कांग्रेस सम्बद्ध नेपाल तरुण दलकै कार्यकर्ताहरुबीच इटहरीमा झडप भएको छ । साँझ भएको झडपमा ६ जना घाइते भएका छन् ।

इटहरीमा विरोध प्रदर्शनको लागि र्‍याली निकालिसकेपछि कोणसभाको क्रममा दुई पक्षबीच झडप भएको हो । लामो समयदेखि तरुण दलका जिल्ला अध्यक्ष सिजन गुरुङ र नेविसंघका पूर्व केन्द्रीय उपसभापति भइसकेका विकास केसीबीचको विवादले झडप निम्त्याएको बताइएको छ ।

यद्यपी केसीले आरोप अस्वीकार गरेका छन् । गत पुस १५ गते तरुण दल इटहरीका अध्यक्ष विष्णु खत्रीले मनोज लिम्बुलाई नगर उपाध्यक्षमा मनोनयन गरेका थिए । तर लिम्बु पूर्णकालीन सदस्य नभएको भन्दै जिल्ला समितिले खारेज गरेपछि विवाद चर्किएको थियो । जुलुस सकिएर कोणसभाका क्रममा चोकमै दुई समुहबीच हानाहान भएको थियो ।

आफ्नो पक्षका दुई जना र लिम्बु पक्षका ४ जना युवाहरु घाइते भएको गुरुङले बताए । उनले तरुण दलको बढ्दो सक्रियतालाई नेविसंघको नेतृत्व सम्हालेका विकास केसीले हेर्न नसकेको प्रतिक्रिया दिएका छन् । ‘३ ख को कार्यक्रममा जानुपर्ने मनोजलाई विकासले ३ क को कार्यक्रममा बोलाएर सुनियोजित रुपमा आक्रमण गरेको हो,’ उनले भने ।

केसीले भने घटनामा आफ्नो संलग्नता अस्वीकार गर्दै संलग्नता पाइए साधारण सदस्यता नै त्याग्ने बताए । कोभिड १९ को सुनसरी संयोजकसमेत रहेका केसीले भने, ‘मेरो संलग्नता छैन, बरु गुरुङ र लिम्बुलाई कारवाही गर्नुपर्छ ।’ पार्टीले १० वर्षदेखि पूर्णकालिन सदस्यता नबाँडेको बताउँदै मनोनयन खारेज गर्ने जिल्ला समितिको निर्णय व्यवहारिक नभएको बताए ।