संघीय संसदकै झल्को दिनेगरी सन्धिखर्क नगरपालिकाको हिउँदे अधिवेशन सम्पन्न

सन्धिखर्क : अर्घाखाँचीको सन्धिखर्क नगरपालिकाले संघीय संसद भवनको झल्को दिनेगरी हिउँदे अधिवेशन सम्पन्न भएको छ। नगरपालिकाको हिउँदे अधिवेशन तथा आठौं नगरसभा अधिवेशन सम्पन्न भएको हो ।  

संघीय संसदमा हिउँदे अधिवेशन गर्ने समयमा संसद विघटन भएपनि संघीय संसदकै झल्को दिनेगरी सन्धिखर्क नगरपालिकाको हिउँदे अधिबेशन सम्पन्न भएको हो । सभाहलमा नगर सभाका सदस्यहरु बसिरहेका थिए । त्यसैबेला नगरपालिकाका नगर प्रमुख कमल प्रसाद भुसाल ढोकाबाट भित्र छिर्दै थिए । ढोकाबाट भित्र छिर्दै गर्दा सबै नगर सभाका सदस्यहरु जुरुक्क उठे । एक छिनमा राष्ट्रियगान बज्न सुरु भयो । सबै नगरसभाका सदस्यहरु जुरुक्क उठेर राष्ट्रगान गाए । 

राष्ट्रगान सकिएपछि नगर सभा सुरु भएको भनेर नगर प्रमुख कमल प्रसाद भुसालले जानकारी गराए । उनले विभिन्न अनुसुची, प्रतिवेदन, कार्यविधि र प्रतिवेदनहरु नगर उपप्रमुख ठाकुर कुमार विक र  नगर प्रवक्ता लिलाराम गौतमलाई  विभिन्न विधेयक र प्रतिवेदन प्रस्तुत गर्न लगाएका थिए । 

आर्थिक ऐन २०७७ का अनुसचीका दररेट संशोधनमाथि छलफल , आर्थिक वर्ष २०७७।७८ को योजना तथा बजेट रकमान्तर , संशोधन तथा कर्मचारी सेवा सुविधा सम्बन्धी प्रतिवेदन, बेरुजु सम्बन्धी विवरण नगर उपप्रमुख ठाकुर कुमार बिकले प्रस्तुत गरेका थिए । नगर प्रवक्ता लिलाराम गौतमले कार्यपालिका निर्णयहरुको सारसंक्षेप प्रस्तुत गरेका थिए । 

प्रस्तुत गरेको प्रतिवेदन तथा विधेयकमा सुझाब राख्न नगरसभाका सदस्यलाई ३ मिनेटको समय उपलबध गराएर सबैको सर्बसहमतिमा विधेयक तथा संसोधनहरु पारित गर्दै अधिवेशन सम्पन्न भएको हो । 

हेर्दा लाग्थ्यो केन्द्रीय सांसद भवनमा प्रस्तुत गरेको नीति तथा कार्यक्रम हो । सनिधखर्क नगरपालिकाले  सिंहदरवारको केन्द्रीय सांसद भवनको झल्को दिने गरी नीति तथा कार्यक्रम प्रस्तुत गर्दै हिउँदे अधिवेशन सम्पन्न गरेको प्रमुख प्रशासकीय अधिकृत कृष्ण प्रसाद सापकोटाले बताए । 

हिउँदे अधिवेशनको शून्य समयमा बोल्दै नगर सभाका सदस्यहरुले कृषि र पशुपालनलाई पहिलो प्राथमिकतामा कार्यक्रमहरु बनाउनुपर्ने, गरिब र विपन्नमुखी कार्यक्रममहरु सञ्चालन गर्नुपर्ने, सामुदायिक  विद्यालयको गुणस्तर वृद्धि गर्न नयाँ कार्यक्रमहरु सञ्चालन गर्नुपर्ने, भौतिक विकासका काम मात्र नभइ सामाजिक विकासका कार्यक्रमहरु सञ्चालन गर्नुपर्नेलगायतका विषयमा नगर सभाको ध्यानाकर्षण गराएका थिए । 

शून्य समयमा नगर सभाका सदस्यहरु लक्ष्मण पराजुली, सुष्मा श्रेष्ठ, विष्णुप्रसाद आचार्य, दधिराम सोमै, देवी थापा, नरेन्द्र आचार्य, विष्णु प्रसाद भुसाल, सुमित्रा विक, सुमित्रा मुखीया, मिना सावत, उमेश अधिकारी, नारायण अर्याललगायतले आ-आफ्नो विचार राखेका थिए।