जनकपुरधाम : जनकपुरधामका विभिन्न ठाउँमा सार्वजनिक शौचालय बनाउन थालेको बर्सौं भए पनि अझै सकिएको छैन । अर्कातिर भएका शौचालयको उचित व्यवस्थापन नहुँदा आगन्तुकले सास्ती खेप्नुपरेको छ ।
प्रदेश २ को अस्थायी राजधानीसमेत रहेको जनकपुरधाम ऐतिहासिक, धार्मिक तथा साँस्कृतिक सहर हो । भएका शौचालयको व्यवस्थापन नहुँदा जनकपुरधाम घुम्न आउनेहरू दिसापिसाब लाग्दा कठिनाइ हुने गरेको बताउँछन् । तिनको रेखदेख नहुँदा खण्डहर बनेका छन् ।
तत्कालीन जिल्ला विकास समिति (जिविस), नगरपालिका, बृहत्तर जनकपुर क्षेत्र विकास परिषद्लगायत निकायको संयुक्त लगानीमा सुविधासम्पन्न २६ कोठाको सार्वजनिक शौचालय निर्माणको सम्झौता भएको थियो । करिब २४ लाख रुपैयाँमा सम्झौता भए पनि अहिलेसम्म शौचालय बनेको छैन ।
जनकपुरधाम उप–महानगरपालिका–४ स्थित गंगासागरको दक्षिण श्मशानघाट नजिकै बृहत्तर जनकपुर क्षेत्र विकास परिषद्ले ६ वर्षअघि ३१ लाख रुपैयाँको लागतमा शौचालय निर्माण ग¥यो । तर रेखदेख नहुँदा उपयोग हुन नसकेको स्थानीय रामकेवल साहले बताए । ‘प्रयोगमा नआएपछि केही वर्षयता केही मानिस शौचालयमा नै बस्न थालेका छन्,’ उनले भने, ‘सार्वजनिक शौचालयको निजी प्रयोग भइरहेको छ ।’
बाह्रबिघा रंगभूमि मैदानमा पनि त्यहाँ हुने धार्मिक मेला, महोत्सव मध्यनजर गर्दै आव ०६५÷६६ मा नै बनाउन थालिएको शौचालय अझैसम्म तयार भएको छैन । बाह्रबिघाको उत्तरपूर्व कुनामा भारतीय दूतावासको सहयोगमा बृहत्तर जनकपुर क्षेत्र बिकास परिषद्ले शौचालय निर्माण थालेको थियो । ३५ लाख रुपैयाँ लागतको उक्त शौचालय पनि बनाउन थालेको १० वर्षमा पनि सञ्चालनमा आउन सकेको छैन ।
बृहत्तर जनकपुर क्षेत्र बिकास परिषद्का प्रशासकीय अधिकृत चिरञ्जीवी ढुंगानाले भारतीय दूतावासको सहयोगमा बनेको शौचालय र बाह्रबिघामा सौन्दर्यीकरणमा अनियमितताको आशंकापछि अख्तियार दुरूपयोग अनुसन्धान आयोगले निर्माणसम्बन्धी फाइल हेरिरहेको हुँदा काम गर्न नसकेको बताए । ‘कूल ७ करोडको बजेटमा बाह्रबिघा सौन्दर्यीकरण, गंगासागर घाटमा मास्क लाइट, पर्खाल, गेट, शौचालयलगायत अन्य निर्माणमा अख्तियारको छानबिनपछि भुक्तानी रोकिँदा ठेकेदारले हस्तान्तरण गरेको छैन, त्यसैले सबै अलपत्र छ,’ उनले भने ।
प्रतिक्रिया दिनुहोस !
