ब्रसेल्स: यूरोपको राजधानीको रूपमा परिचित बेल्जियमको लुभेन नगरपालिकामा पहिलो पटक नेपाली मूलका कृष्ण सगुन क्षेत्री नगरपालिका सदस्य पदमा चयन भएका छन् ।
बेल्जियममा झन्डै तीन दशक यता नेपालीहरु बसोबास गर्न थालेका हुन् । विगतका वर्षहरुमा संघीय संसद, प्रदेश संसद र स्थानीय तहको निर्वाचनमा भाग लिए पनि यसअघि नेपालीहरु विजयी हुन सकेका थिएनन् ।
पर्बत जिल्लाको जलजला गाउँपालिकामा जन्मेका क्षेत्री १० वर्ष नेदरल्यान्डमा थिए भने बसाइसराई अनुरूप सन् २०१४ देखि बेल्जियमको ब्रसेल्ससँगै जोडिएको लुभेन नगरपालिकामा बस्दै आएका छन् ।
प्रमाणपत्र तहसम्मको नेपालमै औपचारिक शिक्षा लिएका क्षेत्री फ्ल्यान्डरेन क्षेत्रमा बोलिने डच भाषामा पोख्त छन् । श्रीमती सगुन केसी, छोरा अभियान र छोरी आर्याना सहित चार जनाको परिवारसँगै बस्दैआएका क्षेत्री लुभेनका रेष्टुरेन्ट व्यवसायी समेत हुन् ।
गत स्थानीय निर्वाचनमा बेल्जियमको राष्ट्रवादी पार्टीको रूपमा परिचित एनभीआबाट उम्मेदवार रहेका क्षेत्री सो पार्टीको उम्मेदवार सूचीमा सातौँ नम्बरमा थिए । एनभीआले ४७ सदस्यीय नगरपालिका परिषदमा ११ सिट जितेको थियो । पार्टीले ११ सिट जिते पनि उम्मेद्वार सूचिको सातौँ नम्बरमा रहेका क्षेत्री समानुपातिक चयन प्रक्रियामा वैकल्पिक सूचीमा एक नम्बरमा थिए ।
सोसलिस्ट पार्टीहरुको गठबन्धन सरकार रहेको लुभेन नगरपालिकामा एनभीआ प्रमुख प्रतिपक्षीको भूमिकामा छ । उनको पार्टीबाट चुनाव जितेकी तिने एरलिङेनले पद छोडे पछि सातौ नम्बरमा रहेका क्षेत्री बैकल्पिकबाट स्वतस् नगरपालिका सदस्य भएका हुन् । आगामी २५ जनवरीमा शपथग्रहणपछि औपचारिक रुपमा उनले पदभार ग्रहण गर्ने कुरा सो पार्टीले बताएको छ ।
क्याथोलिक विश्वबिद्यालय प्ग्ले प्रसिद्ध रहेको लुभेन नगरपालिका संसारभरका विद्यार्थीहरुको आकर्षण केन्द्र पनि मानिन्छ । २ हजार बढी स्थायी नेपाली समुदायको बसोबास रहेको यस क्षेत्र ज्ञान, विज्ञान र कलाको क्षेत्रमा युरोपको केन्द्र मानिएको छ भने हरेक स्थानीय राजनैतिक पार्टीमा नेपालीले पकड जमाउँदै गएका छन् ।
गत निर्वाचनमा स्थानीय र प्रदेश सभातर्फ १२ जना नेपाली मूलका उम्मेदवारहरूले विभिन्न दलबाट उम्मेद्वारी दिए पनि १९ मतले क्षेत्री पराजित थिए भने एस्पीआबाट सूर्य ढकाल र पिभिढीआबाट बिरमान मगरले झिनो अन्तरले हारेका थिए ।
प्रतिक्रिया दिनुहोस !
