तारुका मेला : ४३ हल गोरु जुधाइयो (फोटो फिचर)

तारुका : माघे संक्रान्ती गोरु मेला बिहीबार नुवाकोटका विभिन्न स्थानमा गरिएका छन् । प्रत्येक वर्षको माघे संक्रान्तिका दिन नुवाकोटको दक्षिणी भेगमा रहेको तारुका गोरु जुधाउने मेलाको रुपमा देशकै एकमात्र नमूना र पहिचानको रुपमा परिचित भइसकेको छ । 

तारुकाको पर्यटकीय गाउँ चन्दनीमा हुँदै आएको गोरु जुधाउने मेला यसवर्ष पनि २२ हल गोरु जुधाएरसँगै सम्पन्न भएको छ ।  माघे संक्रान्तिका अवसरमा नेपालको मुख्य स्थान तारुकाको चन्दनीमा विशेष मेलाको रुपमा यस वर्षको गोरु जुधाई मेला सकिएको  हो । 

तारकेश्वर गाउँपालिका–३ चन्दनीमा भएको मेलामा सहभागी भएका गोरु धनीले  यसलाई राष्ट्रिय पर्व मनाउन माग गरेका छन् । 

गोरु जुधाई मेला २०७७ का अध्यक्ष सूर्यमान श्रेष्ठले किसानले स्थानीय पर्वको रुपमा विस्तार भइरहेको गोरु जुधाई मेलामा निकै सक्रियता अपनाइएको बताए । किसानले मेलाको निरन्तरताका लागि एकलाख ११ हजार एक सय ११ रुपैयाँको कोष स्थापना गरेर गाउँको मौलिकताको उजागर गरिरहको उनले जानकारी दिए । 

तारुका चन्दनीको गोरु जुधाइलाई राष्ट्रियकरण गरिनु पर्ने माग गर्दै यस वर्षदेखि मेलाको आयोजक स्थानीय तहमार्फत गरिएको अध्यक्ष श्रेष्ठले जानकारी दिए । उनले यस वर्ष विजेता तथा उपविजेता गोरु धनीलाई गत वर्ष भन्दा बढी पुरस्कार दिइएको बताए । 

जुधाइका गोरुलाई तीन वर्गमा वर्गीकरण गरेर क वर्गका विजेतालाई नगद नौ हजार, उपविजेतालाई आठ तथा ख वर्गका विजेता गोरुका धनीलाई आठ र उपविजेतालाई सात तथा ग वर्गका गोरु धनीका विजेतालाई नगद चार र उपविजेतालाई नगद तीन हजार रुपैयाँ पुरस्कार दिइएको मेला आयोजक समितिका कोषाध्यक्ष मदनकुमार श्रेष्ठले बताए । मैदानमा उतारिएका गोरुका हल कुनै आधा घण्टाभन्दा बढी त कुनै गोरु केही मिनेटमात्रै जुधेर बाहिरिएका थिए । 

मूल्यांकन समितिले मुल्यांकन गरेर पुरस्कार वितरण गरिएको मेला आयोजक समितका सचिव विष्णुप्रसाद जम्कट्टेलले जानकारी दिए । 

चन्दनीका साथै यस वर्ष नुवाकोटका विभिन्न स्थानमा बिहीबार ४३ हल गोरुवीच भिडन्त भएको छ ।  बिहीबार नुवाकोटकै वेत्रावती, घलेभन्ज्याङ, तादी र शिवपुरीमा गोरु जुधाई मेला भएको छ ।

तारुकाको चन्दनीमा जित्ने र हार्ने दुवै गोरुका धनीलाई प्रोत्साहनस्वरुप आयोजकका तर्फवाट प्रमुख अतिथी स्थानीयवासी तथा विघटित प्रतिनिधि सभा सदस्य नारायणप्रसाद खवितवडाले नगद तथा प्रमाणपत्र पुरस्कार प्रदान गरे ।  

बागमति प्रदेशसभा सदस्य हिरानाथ खतिवडाले तारुकाको मौलिक पहिचान र संस्कृति बोकेको यस मेलालाई सरकारी स्तरबाट संरक्षण गरिनु पर्ने बताए । 

कार्यक्रममा जिल्ला समन्वय समिति नुवाकोटका प्रमुख सन्तमान तामाङले मौलिकता नै स्थानीय, जिल्ला तथा देशकै पहिचान भएको बताए । 

यो मेलाको आकर्षण नुवाकोटमा मात्र होइन देशभर रहेको छ । स्थानीय माधवप्रसाद वख्रेलले आफूले गोरु जोत्नका लागि नभई २० वर्षदेखि जुधाउनकै लागि पाल्ने गरेको बताए । 

कसको गोरुले कुनलाई जित्यो ? 

तारुकाको चन्दनीमा पहिलो पटक मैदानमा उत्रिएको सोवितमान श्रेष्ठको गोरुलाई लक्ष्मण प्रधानको गोरुले धुलो चटायो । राजन अधिकारीको गोरुले दिव्यमान श्रेष्ठको गोरुलाई मैदानबाट लखेट्यो । 

यसपछि मैदानमा उत्रिएको विष्णुमान श्रेष्ठको गोरुले सुजन श्रेष्ठको गोरु, सन्जय श्रेष्ठको गोरुले रस्किन न्यौपानेको गोरुलाई पराजित ग¥यो । हजारौं दर्शकले मनले धित मरुन्जेल गोरु जुधेको हेरेर भरपुर आनन्द लिए । 

तारुकाको पौरख नेपालको गौरव भन्ने मूल नाराका साथ यस वर्ष बृहत् रुपमा गोरु जुधाई मेला गरिएको हो । तारुकामा सामाजिक तथा सांस्कृतिक रुपले धेरै महत्व बोकेको ३६ वर्षदेखि गोरु जुधाउंदै आएका मदन श्रेष्ठले बताए  । 

तारुका गोरु जुधाई मेला व्यवस्थापन समितिले प्रत्येक गोरुका धनी किसानसँग एकहजार रुपैयाँ दर्ता शुल्क लिएको थियो ।  तारुकामा गोरु जुधाई मेलालाई राष्ट्रिय पर्व बनाउनु पर्ने स्थानीयवासी चोकराज शाक्यले माग गरे ।  

नुवाकोट उद्योग वाणिज्य संघका अध्यक्ष ताराबहादुर कार्कीले आफूले तारुका चन्दनीको गोरु जुधाई मेलाका लागि आवश्यक सहयोग गर्ने पनि जनाए । 

मेलामा सदरमुकाम विदुर, छिमेकी, धादिङ, रसुवा, काठमाडौं तथा चितवन तथा आसपासका गाउँका हजारौंको भीड मेलास्थल पुगेका थिए ।