कस्तुरीको दाँत र हतियारसहित पाँचजना पक्राउ

डोल्पा : शे–फोक्सुण्डो राष्ट्रिय निकुञ्जले पाँच जनालाई पक्राउ गरेको छ । कस्तुरीको दाँत र हतियारसहित निकुञ्जको टोलीले पाँचजनालाई पक्राउ गरेको छ । निकुञ्जको टोली र नेपाल प्रहरीको विशेष सूचनाको आधारमा माघ १ गते राति जिल्लाको त्रिपूरा सुन्दरी नगरपालिका पाँचजनलाई पक्राउ गरेको जनाएको छ । 

पक्राउ पर्नेमा त्रिपूरा सुन्दरी नगरपालिका ११ वर्ष ४५ का मनबहादुर बुढा, ११ कै वर्ष ३७ का चन्द्रप्रसाद बुढा, वडा नम्बर ७ का वर्ष ४१ का सूर्यबहादुर बुढा, वर्ष ३० का चन्द्र केसी र वर्ष २१ का गोकर्ण बुढा स–प्रमाणसहित पक्राउ परेको शे–फोक्सुण्डो राष्ट्रिय निकुञ्जका प्रमुख निमित्त संरक्षण अधिकृत सरोजमणि पौडेलले जानकारी दिए ।
 

पौडेलका अनुसार उनीहरुको साथबाट भरुवा बन्दुक २ थान, गोली ५० थान, बारुदको डिब्बा २ थान, वन्यजन्तुको जस्तो देखिने सिङमा बारुद भरिएको २ थान, कस्तुरीको दारा ५ थान र एक भाँचिएको सहित ६ थान, केप एक डिब्बा, कस्तुरीको जस्तो देखिने खुट्टा दुई थान, वन्यजन्तुको सिङ एकथान, कस्तुरी मार्न प्रयोग गरिने पासो १४ थान र सलाइ एक थान बरामद भएको बताए ।
    
विशेष सूचना पाएपछि प्रहरी र निकुञ्जको टोलीले उनीहरुलाई पक्राउ गरेको प्रहरी नायब उपरिक्षक राजु पाण्डेले जानकारी दिए । निकुञ्जका सिनियर गेमस्काउट धर्मराज हमालको नेतृत्वमा नेपाल प्रहरीको त्रिपूराकोट चौकीको टोलीले  पाँच जनालाई पक्राउ गरेको हो । 

राष्ट्रिय निकुञ्ज तथा बन्यजन्तु संरक्षण ऐन २०२९ को दफा २६ अनुसार पक्राउ परेका पाँचैजना कस्तुरीको शिकारमा संलग्नलाई कारबाही हुने प्रहरीले जनाएको छ ।