बाइडेनको शपथग्रहण समारोह भइरहँदा ट्रम्पले वासिंटन छाडे
वासिंटन: अमेरिकामा नवनिर्वाचित राष्ट्रपति जो बाइडेनले शपथग्रहणको तयारी गरिरहँदा निवर्तमान राष्ट्रपति डोनल्ड ट्रम्पले भने अन्तिम घडीमा राजधानी वासिंटन छाडे ।
ट्रम्प र उनकी पत्नी मेलानिया बुधबार नै फ्लोरिडा पुगेका छन् । ट्रम्प बुधबार बिहान संक्षिप्त रुपमा आयोजित बिदाइ कार्यक्रममा सहभागी भएर तुरुन्त फ्लोरिडाका लागि उडेका हुन् ।
त्यस क्रममा ट्रम्पले आफू निरन्तर लडिरहने प्रतिक्रिया दिएका थिए । साथै बाइडेन प्रशासनलाई आगामी कार्यकालका लागि शुभकामना पनि दिएका थिए ।
'तपाईँहरु अचम्मको मान्छे हो । यो महान महान देश हो । तपाईँहरुको राष्ट्रपति हुनु मेरो लागि महान सुअवसरको कुरा हो,' ट्रम्पले बुधबार बिहान बिदाइ कार्यक्रममा सहभागीहरुमाझ भनेका थिए ।
ह्वाइटहाउसमा बाइडेन र उपराष्ट्रपति कमला ह्यारिसले शपथ लिइरहँदा ट्रम्प भने फ्लोरिडामा हुनेछन् । अमेरिकामा यसअघि निवर्तमान राष्ट्रपति पनि नवनिर्वाचित राष्ट्रपतिको शपथ ग्रहण समारोहमा उपस्थित हुने राजनीतिक संस्कार छ ।
तर ट्रम्पले यसअघि नै बाइडेनको शपथग्रहण समारोहमा उपस्थित नहुने बताएका थिए । तर पनि फ्लोरिडा जाँदै गर्दा बाटोमै ट्रम्पले शपथग्रहण समारोह अवलोकन गरेको बुझिएको छ ।
सिएनएनमा प्रकाशित समाचार अनुसार उडानको समयमा शपथग्रहण समारोहको तयारी भइरहेको दृश्य ट्रम्पले हेरेका थिए । उडानकै क्रममा सँगै यात्रा गरिरहेका एक व्यक्तिले सिएनएनलाई यसबारे जानकारी दिएको सिएनएनले लेखेको छ ।