ओलीविरुद्ध सडक आन्दोलन र संगठन विस्तार सँगसँगै : रावल
माघ ११, २०७७ आइतबार १८:५:०
धनगढी : नेपाल कम्युनिस्ट पार्टी (नेकपा) प्रचण्ड–नेपाल समूह सुदूरपश्चिम इञ्चार्ज तथा पूर्व उप्रप्रधानमन्त्री भीम रावलले, केपी ओलीको निर्णयविरुद्ध सडक आन्दोलन र संगठन विस्तारको कार्य सँगसँगै लैजाने बताएका छन् ।
प्रचण्ड नेपाल समूहको नेकपाले माघ १७ गते धनगढीमा गर्न लागेको बृहत जनप्रदर्शन बारेको पत्रकार सम्मेलनमा रावलले यस्तो बताएका हुन । ‘केपी ओलीको असंवैधानिक निर्णयविरुद्ध सडकमा पनि आन्दोलन हुन्छ, संगठन विस्तार पनि संगसँगै गरिन्छ’ नेता रावलले भने ।
उनले, केपी सरकार नभएर त्यो किर्ते सरकार भएको आरोप लगाए । ‘केपी सरकार होइन, त्यो किर्ते सरकार हो, त्यस सरकारले धेरै किर्ते गरेको छ’ उनले भने । ओली समूहले यस अघि नै धनगढीमा बृहत आमसभाको आयोजना गरिसकेको छ ।
प्रचण्ड नेपाल समूहको पनि सुदूरपश्चिमका यसै माघ १७ गते शक्ति प्रदर्शन गर्ने कार्यक्रम रहेको छ । उक्त कार्यक्रममा नेकपाका अध्यक्षद्वय प्रचण्ड र माधवकुमार नेपाल आउने पत्रकार सम्मेलनमा जानकारी दिइयो ।
एक महिनादेखि प्रदेश सरकारका दुई मन्त्री रिक्त छन् ।सुदूरपश्चिमका दुई मन्त्रालयमा मन्त्री नियुक्ती बारे पत्रकारहरुले सोधेका प्रश्नमा नेता रावलले, त्यो कुरा मुख्यमन्त्रीको जिम्मेवारीमा आउने बताए ।
‘मन्त्रीमण्डल विस्तारको काम मुख्यमन्त्रीको हो, पार्टीले जनताको काम समयमा गर्नुस, जे आवश्यक छ, त्यो गरिहाल्नुस भनेर नीतिगत निर्णय गर्ने हो, मुख्यमन्त्रीले आवश्यकता अनुसार त्यो गर्छन होला’, रावलले भने ।
ओली समूहमा लागेको भन्दै सुदूरपश्चिम प्रदेश सरकारका भौतिक पुर्वाधार र आर्थिक मामिला तथा योजना मन्त्रालय खाली छन् । मन्त्रीका आकांक्षी बढी भएकाले, अहिलेसम्म मुख्यमन्त्रीले मन्त्री नियुक्त गर्न सकेका छैनन् ।
प्रतिक्रिया दिनुहोस !
