धनगढी : सुदूरपश्चिमका नौ जिल्लामध्ये बाजुरा बाहेकका ८ जिल्लामा मंगलबारदेखि कोरोना विरुद्धको खोप सुरु भएको छ । बाजुरा टाढाको जिल्ला भएकाले खोप ढिला पुगेकाले बिहीबारदेखि मात्रै खोप सुरु हुने सुदूरपश्चिम स्वास्थ्य निर्देशनालयले जनाएको छ ।
भारत सरकारले अनुदानमा दिएका १० लाख कोरोना विरुद्धका खोपमध्ये सोमबार बेलुकी मात्रै ३६ हजार डोज खोप धनगढी पुगेका थिए । काठमाडौंबाट एउटै रेफ्रिजरेटर भ्यानमा लुम्बिनी प्रदेश, प्रदेश नम्बर ५ र सुदूरपश्चिम प्रदेशका लागि खोप पठाइएका थिए ।
बुटबल र नेपालगञ्जमा खोप झारेर रेफ्रिजरेटर भ्यान सोमबार बेलुकी ६ बजेमात्रै धनगढी पुगेको थियो । राती नै ९ जटा जिल्लाका लागि तीन टोली बनाएर सुदूरपश्चिम स्वास्थ्य आपुर्ती ब्यवस्थापन केन्द्रले खोप पठाएको थियो । डोटी, अछाम र बाजुरा, डडेल्धुरा र बझाङ, बैतडी र दार्चुला गरी तीन वटा खोप टोलीहरु पठाइएको थियो ।
बाजुरामा बुधबार अपरान्ह मात्रै रेफ्रिजरेटर भ्यान पुग्ने भएकाले विहीबार देखि खोप सुरु हुने सुदूरपश्चिम स्वास्थ्य निर्देशनायका निर्देशक डाक्टर गुणराज अवस्थीले बताए । बाजुरा बाहेक, कैलालीको टीकापुर र सेती प्रादेशीक अस्पताल, कञ्चनपुरको महाकाली अञ्चल अस्पताल, डडेल्धुराको डडेल्धुरा अस्पताल, बैतडी, दार्चुला, डोटी र अछामका जिल्ला अस्पतालमा हरुमा कोरोना विरुद्धको खोप सेवा बुधबार देखि नै सुरु भइसकेको स्वास्थ्य निर्देशनालयले जनाएको छ ।
कैलालीको सेती प्रादेशीक अस्पतालमा सुदूरपश्चिमका मुख्यमन्त्री त्रिलोचन भट्टले खोप कार्यक्रमको सुरुवात गरे । भारतले अनुदानमा दिएको खोप बक्स हस्तान्तरण गर्दै उनले खोप कार्यक्रमको सुरुवात गरेका हुन । खोप कार्यक्रममा मुख्यमन्त्री भट्टले कोरोनाको खोप लगाएका व्यक्तिहरुले पहिलेको जस्तै सावधानी भने अपनाउन आग्रह गरे ।
'खोप लगाएका व्यक्तिहरुले पहिलेकोजस्तै मास्क, सेनेटाइजर, हातधुने र अरु सावधानीका उपायहरु अपनाउनु होला,' उनले भने । मुख्यमन्त्री भट्टले सुदूरपश्चिम सरकार पनि आफ्ना नागरिकका लागि निशुल्क कोरोना विरुद्धको खोप छिट्टै ल्याउने तयारीमा रहेको बताए ।
धनगढीको सेती प्रादेशीक अस्पतालमा कोरोना खोप लगाउँदै सुदूरपश्चिम स्वास्थ्य निर्देशक डाक्टर गुणराज अवस्थी । तस्बिर : शिवराज भट्ट
खोपका बारेमा विभिन्न नकारात्मक टिप्पणी भइरहेका बेला, सेती प्रादेशीक अस्पतालमा पहिलो खोप स्वास्थ्य निर्देशक डाक्टर गुणराज अवस्थीले लगाए । 'सरकारले आफ्ना नागरिकको स्वास्थ्यप्रति गम्भीर भएर यस्ता खोप कार्यक्रमहरु ल्याउने गर्छ, त्यसमा नागरिकहरुले कुनै शंका नमानी लगाउनुपर्छ, स्वास्थ्यकर्मीमा पनि दुविधा देखिएकाले मैले नै पहिलो खोप लगाएको हुँ,' उनले भने ।
उनले, विश्व स्वास्थ्य संगठनले प्रमाणिकरण गरेको फर्मुलामा खोपहरु आएकाले विना कुनै आशंका खोप लगाउन सबै स्वास्थ्यकर्मीहरुलाई आग्रह गरे । सरकारले, पहिलो चरणमा आएका अनुदानका खोपहरु कोरोना उपचारको अग्रपंतीमा खटिएका स्वास्थ्यकर्मी, सरसफाईकर्मी, स्वास्थ्य स्वयम सेविका, एम्बुलेन्स चालक, शववाहनका चालक र कर्मचारी, खोप कार्यक्रममा खटिएका सुरक्षाकर्मीलाई लगाउने निर्देशीका बनाएको छ ।
खोप लगाउँदा खुसी
नन्दी खडका धनगढी उपमहानगरपालिकाको वडा नम्बर १२ जगेडाकी स्वास्थ्य स्वयम सेविका हुन् । ४५ वर्षीय उनले गाउँमा बिरामी परेका हरेकका घरमा जानुपर्छ र उनीहरुलाई अस्पतालसम्म पठाउने काम गर्छिन्।
कोरोना महामारीका बेला पनि उनी गाउँमा क्वारेन्टाइन, आइसोलेसनमा खटिइन् । बुधबार कोरोना विरुद्धको खोप लगाउन उनी धनगढीको सेती अस्पताल पुगिन् । 'खोप लगाउन पाउँदा खुसी छु,' उनले भनिन् । ‘सरकारले यति छिटो खोप ल्याउँला भन्ने सोचेकै थिएन, तर हेर्दा हेर्दै कुनै औषधि नभएको रोगका लागि खोप पनि लगाउन पाइयो।'
उनले खोपले कोरोनाबाट जोगिने आशा गरिन् । 'खोप भनेको रोग लाग्न नदिनका लागि हो, त्यसैले खोप लगाए, 'उनले भनिन् । धनगढी उपमहानगरपालिका वडा नम्बर ८ की मीना राना पनि स्वास्थ्य स्वयम सेविका हुन् । उनको पनि नन्दीको जस्तै काम हो । अस्पताल आउन नमान्ने राना समुदाय उनको कार्यक्षेत्र हो । उनी भन्छिन, 'खोप लगाएपछि अब कोरोना लाग्दैन भनेर ढुक्क भएकी छु ।'
सुदूरपश्चिमका १६ हजार २९३ जनाका लागि ३६ हजार डोज कोरोनाको भ्याक्सिन आएको छ । सुदूरपश्चिम प्रदेश स्वास्थ्य निर्देशनालयले कोरोना उपचारको अग्रपंक्तिमा खटिएका स्वास्थ्यकर्मी, सरसफाइकर्मी, स्वास्थ्य स्वयम सेविका, एम्बुलेन्स चालक, शववाहनका चालक र कर्मचारी, खोप कार्यक्रममा खटिएका सुरक्षाकर्मी गरी १६ हजार २९३ जनाको लिस्ट केन्द्रमा पठाए बमोजिम यत्तीका खोप आएका हुन ।
निर्देशनालयले दार्चुलाका लागि १२९१, बझाङक लागि १४०९, कञ्चनपुरका लागि २५ सय ९५, कैलालीका लागि ३७ सय ३७, बैतडीका लागि १९ सय ९६, अछामका लागि १८ सय ७१, बाजुराका लागि ८ सय ९०, डडेल्धुराका लागि ११ सय ३५ र डोटीका लागि १४ सय ५९ जनाका लागि पुग्ने खोप पठाईएको जनाएको छ ।_20210127092559.png)
धनगढीको सेती प्रादेशीक अस्पतालमा कोरोना भ्याक्सिनका लागि लाइन लागेका स्वास्थ्यकर्मी र स्वास्थ्य स्वयम सेविका। तस्बिर : शिवराज भट्ट
प्रतिक्रिया दिनुहोस !
