गोरखा : पूर्वयुवराज पारस शाहले बुधबार एकदिन पुर्खाको थलो गोरखामा बिताएका छन् । मंगलबार राति १२ बजे गोरखा आइपुगेका उनी बुधबार करिब छ बजे गोरखाबाट प्रस्थान गरेका छन् ।
मंगलबार एकरात गोरखा दरबार नजिकै रहेको होटल वृन्दावनमा साथीसंगीसँग बिताए ।
पूर्वराजपरिबारको कुलदेवताको रुपमा मानिने गोरखकाली र गोरखनाथको पूजाआजाका लागि होटलबाट ११ बजेपछि निस्किएका थिए ।
त्यहाँ केहीबेर उनले निर्माणाधीन गोरखा दरबारको पनि अवलोकन गरे । दरबारको निर्माण कार्यमा भइरहेको ढिलाइप्रति शाहले साथीसंगीसँग चिन्ता व्यक्त गरेका छन् ।
गोरखनाथका मूल पुजारी प्रदीपनाथ योगीसँग केहीबेर धर्मसंस्कृतिको बारेमा भलाकुसारी भएको थियो । ‘पढेलेखेका मान्छेले सनातन धर्म, संस्कृतिको संरक्षण, जगेर्ना गर्नुपर्नेमा उनीहरुले नै नष्ट गर्दै गए’, योगीले भनेका थिए । ‘यो विस्तारै आफै ठिक हुन्छ’, शाहले प्रतिक्रिया दिएका थिए ।
पूजापाठ, ग्रहशान्ति, दान दक्षिणा र अवलोकन सकेर शाह १ बजे होटल फर्किएका थिए ।
त्यहाँ उनलाई स्वागत गर्न र साथ दिनका लागि गोरखा सदरमुकाम आसपासका राजसंस्थाप्रति आस्थावान, राप्रपाका नेता कार्यकर्ता भेला भएका थिए ।
उनी गोरखा सदरमुकामबाट मनकामनाका लागि दिउँसो चारबजे प्रस्थान गरेका थिए । मनकामना केवलकार चढेर उनी मनकामना देवीको पूजाअर्चना गर्न पुगेका थिए । पूजा सकेर केहीबेरको मनकामना क्षेत्रको अवलोकनपछि उनी साँढे पाँचबजे पोखराका लागि प्रस्थान गरेका छन् ।
राजसंस्थाप्रति आस्थावान विशेषगरी राप्रपाका नेता, कार्यकर्ताले गोरखा भित्रिएदेखि पोखरा नफर्कुन्जेल उनलाई साथ दिएका थिए ।
प्रतिक्रिया दिनुहोस !
