राजविराज: सप्तरीको सप्तकोशी ब्यारेजमा पुषी पूर्णिमाको मेला भर्न पुगेका तीन जना सवार मोटरसाइकल दुर्घटनामा एक युवकको मृत्यु भएको छ ।
हनुमाननगर कंकालिनी नगरपालिका–१ स्थित कोशी ब्यारेजको नहर छेउमा स ३ प ३०४७ नम्बरको मोटरसाइकल दुर्घटनामा पर्दा सप्तरीको तिलाठी कोइलाडी गाउँपालिका–३ मुखिया टोलका ३० वर्षीय शिवकुमार मुखियाको मृत्यु भएको सप्तरी प्रहरीले जनाएको छ ।
दुर्घटनामा गम्भीर घाइते भएका मोटरसाइकल चालक मुखियाको गोल्डेन अस्पताल, विराटनगरमा उपचारका क्रममा मृत्यु भएको हो । मोटरसाइकल अनियन्त्रित भएर सडक छेउमा बिग्रेर राखेको पुरानो रोलरमा ठोक्किएर दुर्घटना भएको जिल्ला प्रहरी कार्यालय सप्तरीका डिएसपी भुवनेश्वरप्रसाद साहले बताए ।
पुर्व–पश्चिम लोकमार्गस्थित कोशी ब्यारेजको नहरको बाटोको उतर छेउमा लामो समयदेखि बिग्रेको पुरानो रोलर राखिएको छ । मोटरसाइकलमा सवार मुखिया टोलकै २५ वर्षीय रामअवतार खंग र २० वर्षीय रामकुमार मुखिया घाइते भएका छन् । घाइतेहरुको गोल्डेन अस्पताल, विराटनगरमा उपचार भइरहेको छ ।
शवलाई पोष्टमार्टमका लागि कोशी अस्पताल विराटनगरमा राखिएको छ । मोटरसाइकल भने इलाका प्रहरी कार्यालय भारदह, सप्तरीमा राखिएको छ ।
सप्तकोशी नदीलगायत जलाशयहरुमा कोशी स्नान गर्न र पुषी पूर्णिमाको मेला भर्न घुइँचो लागेको छ । सप्तकोशी नदीमा सप्तरी, सिरहा, सुनसरी, मोरङ्गदेखि भारतको पुर्णिया, अररीया, मधुवनी, फारबिसगञ्जलगायत स्थानहरुबाट कोशी स्नान गर्न आएका छन् । पौषशुक्ल पुर्णिमाका दिन कोशी स्नान गरे गंगास्नान गरे सरह पुण्य मिल्ने जनविश्वास रहेको छ ।
प्रतिक्रिया दिनुहोस !
