रंगुन: म्यानमारमा पक्राउ परेकी नेत्री आन सान सूकीले सैन्य 'कू'को विरोध गर्न आह्वान गरेकी छन् ।
निर्वाचनमा विजयी नेत्री सूकीको पार्टीले सरकार गठन गर्नुअघि नै सेनाले अचानक सत्ता अपदस्थ गरेपछि म्यानमारको अवस्था अन्योल देखिएको छ । सूकी सहित अन्य प्रभावशाली नेताहरुलाई पनि सेनाले पक्राउ गरेको छ ।
सेनाले सत्ता हत्याएपछि एक वर्षका लागि सङ्कटकाल समेत घोषणा गरिसकेको छ । नेत्री सूकीले आइतबार आफ्ना समर्थकलाई सेनाको कदम अस्वीकार गर्न र सैन्य कूको विरोध गर्न आग्रह गरेकी हुन् ।
म्यानमारमा सेनाले यसअघि पनि लामो समय देशको शासन कब्जा गरेको थियो । शासन व्यवस्था जनतालाई नै सुम्पने बाचा गरे पनि सेनाले निर्वाचनमा धाँधली भएको भन्दै यस पटक सत्ता कब्जा गरेको हो ।
तर निर्वाचनमा धाँधली भएको कुनै प्रमाण सेनाले देखाउन सकेको छैन । यससँगै म्यानमारमा जननिर्वाचित नेताहरुलाई नै पक्राउ गरी सेनाले सत्ता नियन्त्रणमा लिएपछि त्यस कदमको विभिन्न देशमा विरोध भएको छ । म्यानमारमा भने सेनाले सडकमा बाक्लो संख्यामा सैनिक तैनाथ गरी सुरक्षा व्यवस्था कडा बनाएको छ ।
प्रतिक्रिया दिनुहोस !
