नयाँदिल्ली: एक सातादेखि प्रदर्शनकारी किसानहरु र प्रहरीबीच झडप भएपछि सोमबार दिल्लीसँग जोडिएका विभिन्न जिल्लाहरुमा इन्टरनेटको लाइन काटिएको छ ।
विवादास्पद कृषि कानूनको विरोधमा केही महिनादेखि नै विभिन्न जिल्लाका किसानहरु आन्दोलित बनिरहेका छन् । उनीहरुको प्रदर्शन राजधानी दिल्लीतर्फ मोडिएपछि सिमानामा प्रहरीसँग व्यापक भिडन्त भएको हो ।
पछिल्लो समय केही प्रदर्शनकारीको ज्यान नै जाने गरी भिडन्त भएको छ । भारतीय मिडियाका अनुसार सोमबार केन्द्र सरकारले हरियाणा प्रदेशका दिल्लीसँग जोडिएका १४ देखि २२ जिल्लामा इन्टरनेट प्रतिबन्ध लगाएको हो । सरकारी अधिकारीहरुका अनुसार पहिलो पटक मंगलबार हरियाणाका जिल्लाहरुमा २४ घण्टाका लागि इन्टरनेटमा प्रतिबन्ध लगाइएको हो । तर विभिन्न जिल्लामा इन्टरनेट कटौतीको तालिका भिन्दाभिन्दै राखिएको छ ।
यस्तै दिल्लीसँग जोडिएका अन्य केही जिल्लामा पनि इन्टरनेट सेवा काटिएको छ । नागरिक सुरक्षा र सार्वजनिक दंगाबाट बच्नका लागि भन्दै इन्टरनेट काटिएको गृह मन्त्रालयले जनाएको छ ।
गत साता किसानहरुको आन्दोलन हिंसात्मक मोडमा पुगेपछि सरकारले इन्टरनेट सेवा काटेको जनाएको छ । गत नोभेम्बरदेखि नै भारतका विभिन्न प्रान्तबाट ठूलो संख्यामा किसानहरु कृषि कानूनको विरोध गर्दै प्रदर्शन निकाल्न थालेका हुन् ।
नरेन्द्र मोदी नेतृत्वको सरकारले गत सेप्टेम्बरमा तीन वटा विवादास्पद कृषि कानून ल्याएको थियो । तर किसानहरुबाट व्यापक विरोध हुँदैआएको छ । नोभेम्बरदेखि नै दशौँ हजारको संख्यामा किसानहरुले भारतका विभिन्न जिल्लामा प्रदर्शन निकालेका छन् ।
विशेषगरी राजधानी दिल्लीसँग जोडिएका प्रान्तहरुबाट किसानहरुले राजधानीसम्म प्रदर्शन गर्दै जाने भनी र्याली निकालेका थिए । तर प्रहरीको अवरोधपछि उनीहरुले अर्को चरणमा ट्याक्टरसहित नै प्रदर्शन गर्न थालेका छन् । किसानहरुको ट्याक्टर र्यालीलाई भने प्रहरीले रोक्न नसक्दा केही ठाउँमा हिंसा समेत भयो ।
गत साताको मंगलबार भारतको गणतन्त्र दिवसको दिन समेत हजारौँको संख्यामा किसानहरुले विशाल प्रदर्शन निकालेका थिए । राजधानी दिल्लीमा सरकारले गणतन्त्र दिवस मनाइरहँदा किसानहरुले व्यापक विरोध प्रदर्शन निकालेका थिए ।
प्रदर्शनको क्रममा दर्जनौँ अधिकारीहरु घाइते हुनुका साथै एक प्रदर्शनकारी मारिएका छन् । साथै संयुक्त किसान मोर्चाका अनुसार एक सय भन्दा धेरै प्रदर्शनकारी अझै वेपत्ता भएको पनि बताइएको छ ।
प्रतिक्रिया दिनुहोस !
