क्यान्सर दिवसमा मुकेश अम्बानीकी पत्‍नीले खोलिन् 'ब्रेस्ट क्लिनिक'

नयाँदिल्ली: भारतीय कम्पनी रिलायन्स फाउन्डेसनकी अध्यक्ष तथा व्यवसायी मुकेश अम्बानीकी पत्नी नीता अम्बानीले विश्व क्यान्सर दिवसको अवसरमा ब्रेस्ट क्लिनिक सञ्चालन गरेकी छन् ।

'वान स्टप ब्रेस्ट क्लिनिक' नामको नयाँ व्यवसाय नीताले यही बिहीबार घोषणा गरेकी हुन् । महिलाहरुमा क्यान्सरको समस्या बढ्न थालेको अवस्थाप्रति चिन्ता व्यक्त गर्दै नीताले भारतीय महिलाहरुलाई उचित मुल्यमा विश्वस्तरीय स्वास्थ्य सेवा उपलब्ध गराउने प्रतिवद्धता जनाइन् ।

नीताले मुम्बइस्थित 'सर एचएन रिलायन्स फाउन्डेशन हस्पिटल'मा आफ्नो क्लिनिक सुरु गरेकी हुन् । हरेक भारतीय महिलालाई उचित मुल्यमा विश्व स्तरको स्वास्थ्य सेवा उपलब्ध गराउने आफ्नो लक्ष्य रहेको पनि नीताले बताइन् ।

'एक भारतीय र विशेषगरी महिलाको हैसियतमा वान-स्टप ब्रेस्ट क्लिनिक उद्घाटनको घोषणा गर्न पाउनु मेरा लागि ठूलो अवसर हो,' नीताले भनेकी थिइन् ।

'महिलाहरु जन्मजात वहुप्रतिभाशाली छन् । उनीहरु बालबालिका र परिवारको हेरचाह गर्छन्, घर र कार्यालय व्यवस्थापन गर्छन् । निजी र व्यवसायीक जीवन सन्तुलन गर्छन् । तर प्राय उनीहरु आफ्नै स्वास्थ्यको बारेमा बेवास्था गर्छन् वा समय दिन सक्दैनन् । त्यो अवस्था परिवर्तन गरौँ,' उद्घाटनको अवसरमा नीताले भनेकी थिइन् ।

विश्व क्यान्सर अनुसन्धान कोषका अनुसार स्तन क्यान्सर विश्वभरका महिलाहरुमा साझा समस्याको रुपमा देखिएको छ । र भारतमा देखिएका सबै क्यान्सरका बिरामीमध्ये १४ प्रतिशत स्तन क्यान्सरका बिरामी भएको तथ्यांक छ ।