हेटौंडा : सडकमा हिउँ जमेका कारण त्रिभुवन राजपथको भीमफेदी (९ गोलमोडदेखि थाहा -४ दामन) सम्मको सडक अवरुद्ध भएको छ । शनिबार दिउँसो परेको हिमपातका कारण मकवानपुरको दामनस्थित सीमभन्ज्याङस्थित सडकमा यातायात अवरुद्ध भएको इलाका प्रहरी कार्यालय पालुङका प्रहरी निरीक्षक विकासकुमार तामाङले जानकारी दिए।
सडक अवरुद्ध भएपछि अहिले हेटौंडा र काठमाडौंबाट छुटेका सयौं सवारी साधन सीमभन्ज्याङ क्षेत्रमा रोकिएका छन् । सडक डिभिजन कार्यालय हेटौंडाअन्तर्गत दामन क्याम्पबाट खटिएका १० जनाको टोलीले सडकमा जमेको हिउँ हटाएर सडक सुचारु गर्ने प्रयास गरिरहेको सडक विभागका कर्मचारी गणेश खत्रीले बताए ।
सडकमा हिउँ जम्नुका साथै आइतबार बिहान तुषारो जमेपछि त्रिभुवन राजपथमा जोखिम बढेको छ । हिउँ पन्छाएर सडक खुलेपछि पनि पूर्ण होसियारीका साथ सवारी चलाउन जिल्ला प्रहरी कार्यालय मकवानपुरले चालकहरुलाई अनुरोध गरेको छ ।
प्रतिक्रिया दिनुहोस !
