नुवाकोट: नुवाकोटको दुप्चेश्वर गाउँपालिकाले तामाङ समुदायको मुख्य पर्व ‘सोनाम ल्होछार’को अवसरमा तीन दिन सार्वजनिक बिदा दिएको छ ।
पूर्वी भेगमा रहेको दुप्चेश्वर गाउँ कार्यपालिकाको ६८ औँ बैठकले २८५७ औँ सोनाम ल्होछारको अवसरमा गाउँपालिका कार्यालय र त्यसअन्तर्गतका सरकारी कार्यालयमा तीन दिन सार्वजनिक बिदा दिने निर्णय गरेको हो ।
दुप्चेश्वर गाउँपालिका तामाङ समुदायको वाहुल्यता भएकाले यही माघ ३० गतेदेखि फागुन १ गतेसम्मका लागि सार्वजनिक बिदा दिइएको गाउँपालिकाका अध्यक्ष योविन्द्रसिंह तामाङले बिहीबार जानकारी दिए ।
उनका अनुसार तामाङ समुदायको विशेष पर्व २८५७ औं सोनाम ल्होछार पर्व मनाउन गाउँपालिकाको कार्यालय तथा मातहतका कार्यालयहरु र विद्यालयहरुमा सार्वजनिक बिदा दिइएको हो । तामाङ समुदायले ल्होछारलाई सांस्कृतिक तथा धार्मिक पर्वको रुपमा मनाउने गर्छन् । तामाङ भाषामा ‘ल्हो’ को अर्थ वर्ष र ‘सार’ को अर्थ नयाँ भन्ने हुन्छ । त्यसैले ल्होछारको अर्थ नयाँ वर्ष भन्ने हुन्छ ।
चन्द्रमास पात्रा अनुसार माघ शुक्ल प्रतिपदाको दिनलाई ल्होछार अर्थात नयाँ वर्ष मान्ने गरिन्छ । ल्होछारमा १२ वटा जीवजन्तुको नामबाट ल्हो खोर्लो अर्थात् वर्ष चक्रको आधारमा हरेक वर्ष पुरानो वर्षलाई बिदाइ र नयाँ वर्षलाई स्वागत गरी धार्मिक र सांस्कृतिक विधिअनुसार पर्व मनाउने गरिन्छ ।
ल्होसारकै अवसरमा नुवाकोटको पश्चिमी भेगमा रहेको म्यागङ गाउँपालिकाले पनि सोनाम ल्होछारको उपलक्ष्यमा दुई दिन सार्वजानिक विदाको घोषणा गरेको छ । गाउँपालिकाको यही माघ २६ गते बसेको बैठकले माघ २९ र ३० गते दुई दिन सार्वजनिक बिदा दिने निर्णय गरेको हो ।
गाउँपालिकाका अध्यक्ष आशाबहादुर तामाङले विभिन्न समुदायको सांस्कृतिक रितिरिवाज पालिकाको सम्पत्ति भएकाले यसको संरक्षण र सम्वर्द्धन गर्न सार्वजनिक बिदा दिने निर्णय गरिएको बताए । नेपाल सरकारले सोनाम ल्होछारको उपलक्ष्यमा यही माघ ३० गते सार्वजनिक बिदाको घोषणा गरिसकेको छ ।
तामाङ वाहुल्य बसोबास रहेका विभिन्न गाउँपालिकाहरुले पनि सार्वजानिक बिदा घोषणा गरिसकेका छन् । म्यागङ गाउँपालिकामा तामाङ समुदायको बाहुल्यता रहेको छ ।
प्रतिक्रिया दिनुहोस !
