महेन्द्रनगर: कञ्चनपुरको भूमिसुधार तथा मालपोत कार्यालयका प्रमुख र नापी कार्यालयका प्रमुखलाई विभागले स्पष्टिकरण सोधेको छ ।
गत माघमा जिल्लास्थित सरकारी कार्यालयको निरीक्षणको क्रममा मालपोत कार्यालय र नापी कार्यालयका कर्मचारीहरुले तोकिएको पोशाक नलगाएको, सेवाग्राहीमैत्री नभएको र कर्मचारी उपस्थित नभएको पाइएपछि जिल्ला प्रशासन कार्यालय कञ्चनपुरले कारवाहीका लागि सम्बन्धित निकायमा पत्राचार गरेको थियो ।
प्रशासनको पत्राचारपछि दुबै कार्यालयका प्रमुखसँग विभागले स्पष्टिकरण सोधेको छ । भूमिसुधार तथा मालपोत कार्यालय कञ्चनपुरका कार्यालय प्रमुख खेमराज खत्रीले मालपोत कार्यालयका केही कर्मचारीहरुलाई विभागबाट स्पष्टिकरण सोधिएको बताए ।
“गत माघमा सिडिओ साप निरीक्षणमा आएका बेला हाम्रा कर्मचारीहरुले पोसाक नलगाएको र भूलवश एक दिन अगाडीको हाजीरी गरिएको पाइयो ” मालपोत कार्यालयका प्रमुख खत्रीले भने “विभागबाट हामीलाई स्पष्टिकरण सोधिएको छ ।”
उनले कार्यालयका केही कर्मचारीहरुलाई विभागबाट स्पष्टिकरण सोधिएको बताए । नापी कार्यालय कञ्चनपुरका केही कर्मचारीलाई पनि विभागबाट स्पष्टिकरण सोधिएको छ । गत माघमा कार्यालय निरीक्षणको क्रममा पोशाक नलगाएको पाएपछि सम्बन्धित विभागको महानिर्देशकलाई पत्राचार गरेको कञ्चनपुरका प्रमुख जिल्ला अधिकारी रामकुमार महतोले बताए ।
सरकारी कार्यालयहरु सेवाग्राहीमैत्री नभएको गुनासो आएपछि प्रमुख जिल्ला अधिकारी रामकुमार महतोले जिल्लास्थित केही कार्यालयको निरीक्षण गरेका थिए । निरीक्षणका क्रममा कार्यालय प्रमुख वाहेक कुनै पनि कर्मचारीले पोशाक नलगाएको, केही कर्मचारीले हाजिरीमा केरमेट गरेको, भोलिपल्टको हाजिरी एक दिन अगाडी नै लगाएको र पूर्वस्वीकृति विना अनुपस्थित भएको पाइएको थियो ।
प्रतिक्रिया दिनुहोस !
