इन्डोनेसियामा ४६ वटा ह्‍वेल माछा एकैचोटी मरे, जल प्रदुषणको चिन्ता

जकार्ता: इन्डोनेसियाको समुद्री किनारमा अड्किएर रहेका ४६ वटा ह्‍वेल माछा शुक्रबार मरेका छन् ।

अधिकारीहरु उद्वारमा खटिए पनि जम्मा तीनवटा ह्‍वेललाई मात्रै बचाउन सम्भव भएका थिए । स्थानीय मिडियाका अनुसार बिहीबार मात्रै उत्तरी जाभामा रहेको मदुरा टापुस्थित समुद्री किनारमा ४९ वटा साना ह्वेल छटपटाइरहेका थिए ।

माछाहरु यसरी छटपटाएपछि स्वयंसेवकहरुसहित ठूलो संख्यामा उद्वारकर्ता खटाइएका थिए । तर किनारमा भेला भएको भीडका मानिसहरुले ह्वेललाई छुने र फोटो खिच्न व्यस्त देखिन्थे । जसले गर्दा पनि ह्वेललाई बचाउन कठिन भएको थियो ।

यति ठूलो संख्यामा ह्वेल मरेपछि राष्ट्रिय मुद्दा बनेको छ । स्थानीय अधिकारीहरुले यस घटनाबारे थप छानविन गर्ने जनाएका छन् । मानिसले समुद्रमा जथाभावी प्लास्टिक फाल्ने तथा अन्य किसिमका प्रदुषण गर्नाले पछिल्लो समय समुद्री जनावरहरुको जीवन जोखिममा पर्दैगएको बताइन्छ ।

गत वर्षको जुलाइमा पनि पूर्वी नुसा टेंगारा प्रान्तस्थित कुपुङ सहर नजिकै १० वटा ह्वेल मृत भेटिएका थिए । यस्तै २०१८ मा इन्डोनेसियामै मृत रुपमा भेटिएको एउटा ह्वेलको समाचारसँगै एसिया र विश्वभर नै जल प्रदुषण विरुद्ध एक प्रमुख मुद्दा उठेको थियो । जहाँ एउटै मृत ह्वेलको पेटभित्र १ सय भन्दा धेरै प्लास्टिक कप र २५ वटा प्लास्टिक झोला भेटिएपछि जल तथा वातावरणीय प्रदुषणबारे गहन बहस भएका थिए । साथै मानवीय गतिविधिको चर्को आलोचना र टिप्पणी समेत भएको थियो ।