भैरहवा : रुपन्देहीको भैरहवास्थित सिद्धार्थ रंगशालामा जारी नेपाल टेलिकम रुपन्देही सुपर लिग क्रिकेट प्रतियोगिता अन्तर्गत बुधवार भएको डिभिजन ‘ए’को खेलमा न्यू होराइजन क्रिकेट क्लब ७ विकेटले विजयी भएको छ । उसले तिरुपति क्रिकेट क्लबलाई पराजित गरेको हो ।
टस जितेर ब्याटिङमा आएकोे तिरुपतिले निर्धारित ४४ ओभरको खेलमा २८.३ ओभरमा सबै विकेट गुमाउँदै ८३ रनको योगफल बनायो । जसका लागि विपिन न्यौपानेले २० रन, मनोज पुनले १५, सिमान्त शाहीले १० रन बनाए पनि अन्य ब्याट्सम्यानले दोहोरो अंक जोड्न सकेनन् ।
बलिङमा न्यू होराइजनका पुरुषोत्तम भट्टराईले ८.३ ओभरमा ३५ रन खर्चेर ५ विकेट लिए । उनी म्यान अफ द म्याच भए । यस्तै, तुलबहादुर थापाले २ तथा गोविन्द केसी, सुमित पराजुली र राहुल प्रजापतीले समान १÷१ विकेट लिए ।
जवाफी ब्याटिङ गरेको न्यू होराइजनले २३.१ ओभरमा ३ विकेटको क्षतिमा ८४ रन बनाउँदै सहजै लक्ष्य पूरा गर्यो । जसका लागि मनिष थापाले २८ रन, अमर मिश्राले १८ र विशाल खत्रीले नटआउट १४ रनको योगदान गरे । बलिङमा तिरुपतिका वसिर अहम्मद, प्रदीप जैसवाल र विपिन न्यौपानेले समान १÷१ विकेट लिए । बिहीबार डिभिजन ‘ए’ का देवदह क्रिकेट युनिट र वेष्टर्न क्रिकेट क्लबबीच प्रतिस्पर्धा हुने आयोजक संस्था रुपन्देही क्रिकेट संघका अध्यक्ष प्रशान्त विक्रम मल्लले जनाकारी दिए ।
प्रतियोगिताको विजेता टिमले ८० हजार रुपैयाँ र ट्रफी तथा उपविजेताले ४० हजार रुपैयाँ र ट्रफी प्राप्त गर्नेछन् । यस्तै, म्यान अफ द सिरिजलाई १५ हजार, बेष्ट ब्याट्सम्यान, बेष्ट बलर, उदयीमान खेलाडी र म्यान अफ द फाइनललाई ५÷५ हजार तथा प्रत्येक दिनको म्यान अफ द म्याचलाई १ हजार रुपैयाँ प्रदान गरिने आयोजकले जनाएको छ ।
प्रतिक्रिया दिनुहोस !
