धनगढी : सरकार र विप्लव नेतृत्वको नेकपाबीच वार्ता भएसँगै कैलाली कारागारमा रहेका सेती महाकाली इञ्चार्ज तथा केन्द्रीय सदस्य ओम प्रकाश पुन रिहा भएका छन् । उनी २०७७ असार ३१ गते कैलालीको धनगढी उपमहानगरपालिकामा पर्ने कनरीबाट पक्राउ परेका थिए । धनगढी उपमहानगरपालिाको फूलबारीबाट फर्किरहेका बेला उनलाई कनरी क्षेत्रबाट पक्राउ गरिएको थियो ।
प्रहरीले उनले बोकेको झोलामा हतियार भेटिएको भन्दै हातहतियार खरखजाना मुद्धा दर्ता गरेको थियो । सोही मुद्धामा, जिल्ला अदालत कैलालीले गएको साउनमा ५० हजार रकम धरौटी माग गरेको थियो ।
धरौटी नबुझाएपछि, उनलाई साउनमा कैलाली कारागार पठाईएको थियो । शुक्रबार भने उनले ५० हजार धरौटी जमा गरेका छन । ‘अदालतमा मन्त्रीपरिषदको निर्णय नपुगेको र जिल्ला न्यायाधीस पनि बाहिर भएकाले, धरौटी जमा गरेका छौं, त्यो रकम पछि फिर्ता हुन्छ भनिएको छ,' विप्लवका विद्यार्थी नेता बबरजंग शाहीले भने ।
त्यतीबेला धरौटी बुझाए, फेरि पक्राउ गरी अरु जिल्ला पठाउने जानकारी पाएपछि पुनले धरौटी नबुझाएर कैलाली कारागार बस्ने निर्णय गरेका थिए । उनीसँगै पक्राउ परेकी, उनकै श्रीमती तथा अखिल नेपाल महिला संघ क्रान्तिकारीकी नेतृ पूर्णिमा धामी भने साधारण तारेखमा छुटेकी थिइन् ।
पुनसँगै कैलाली कारागारमा रहेका विप्लवकै सेती महाकाली ब्युरो सदस्य विवेक कुमाल पनि शुक्रबार रिहा भएका छन् । उनलाई, हात हतियार खरखजाना सम्बन्धी तीन वटा मुद्धा लगाईएका थिए । उनले, पनि ५० हजार धरौटी बुझाएर रिहा भएका हुन् ।
कुमाललाई काठमाडौंबाट पक्राउ गरि कैलाली कारागार पठाइएको थियो । विप्लब र सरकारबीच वार्ता सफल भएपछि, प्रहरी हिरासतमा रहेका नेता कार्यकर्ताहरु रिहा हुन थालेका हुन् ।
अहिले नै सरकारमा गइदैन : पुन
विप्लव नेतृत्वको नेकपाका सेती महाकाली ईञ्चार्ज ओम प्रकाश पुनले अहिले नै आफुनो दल सरकारमा सहभागी नहुने बताए । उनले, वैज्ञानिक समाजवादका लागि २०६२/६३ सालको जस्तो सर्वदलीय सरकारको परिकल्पना गरिएको बताए ।
नेकपा ओली समूह र विप्लवबीच पार्टी एकीकरणका बारेमा पनि उनले नकारे । 'अहिलेकै अवस्थामा पार्टी एकीकरण सम्भव नै छैन, न त सरकारमा गइन्छ,' उनले भने ।नेता पुनको स्वागतका लागि कैलाली कारागार र कैलाली जिल्ला अदालतमा सैयौं नेता कार्यकर्ता पुगेका थिए । पुनको रिहाइपछि, धनगढीको पार्कचोकमा, कोणसभाको पनि आयोजना गरिएको थियो ।अदालतदेखि पार्कचोकसम्मको झण्डै डेढ किलोमिटर मुख्य बजारमा विप्लवका नेता कार्यकर्ताले र्याली निकालेका थिए ।
प्रतिक्रिया दिनुहोस !
