ब्रासिलिया : ब्राजिलका पूर्वराष्ट्रपति लुइज इनासियो लुला डा सिल्भालाई ब्राजिलका सर्वोच्च अदालतका एक न्यायाधीशले भ्रष्टाचार मुद्दामा उनी निर्दोष रहेको फैसला गरेका छन् । अदालतको फैसलासँगै सिल्भालाई आगामी राष्ट्रपतीय चुनावमा प्रतिस्पर्धा गर्ने बाटो खुलेको छ ।
सिल्भालाई ‘अपरेसन कार वास’ नामक घूस काण्डको अनुसन्धानपछि दोषी ठहर गरिएको थियो । वामपन्थी नेता लुला सन् २०१९ मा १८ महिनाको कैद सजायपछि रिहा भएका थिए ।
ब्राजिलको सर्वोच्च अदालतका न्यायाधीश एड्सन फचिनले लुलाविरुद्धका यसअघिका प्रमाणित आपराधिक दोष रद्द गरिदिएका हुन् । उक्त घूस काण्डमा अन्य नेता तथा व्यापारीहरू पनि परेका थिए ।
यसअघि सिल्भालाई दोषी ठहर गरेको दक्षिणी सहर कुरिचिबाको अदालतलाई उनीविरुद्धका ४ वटा मुद्दा हेर्ने अधिकार नभएको भन्दै न्यायाधीश फचिनले ती मुद्दाको सुनुवाइ राजधानी ब्रासिलियास्थित संघीय अदालतमा हुने फैसला गरेका छन् । सिल्भामाथि लागेका आरोप पुनः प्रमाणित नभएसम्म उनको राजनीतिक अधिकार पुनःस्थापित हुनेछ ।
सन् २०२२ को चुनावमा उनी वर्तमान राष्ट्रपति जइरु बोल्सोनारुविरुद्ध प्रतिस्पर्धा गर्न सक्नेछन् । अभियोजनकर्ताको कार्यालयले मुद्दाको पुनरावलोकन गर्ने जनाएको अन्तराष्ट्रिय सञ्चार माध्यमले उल्लेख गरेको छ ।
सन् २००३ देखि २०१० सम्म ब्राजिलको राष्ट्रपति रहेका लुलालाई सन् २०१८ मा दोषी ठहर गरिएको थियो । दोषी ठहर भएपछि डेढ वर्ष जेल परेका सिल्भालाई राजनीतिक प्रतिस्पर्धामा सहभागी हुन तथा सार्वजनिक पद धारण गर्न प्रतिबन्ध लगाइएको थियो ।
पूर्वराष्ट्रपति सिल्भाले एक विज्ञप्ति जारी गर्दै ‘आफू सधैं सही रहेको भन्ने विषयको यो स्विकारोक्ति मात्र भएको’ जनाएका छन् । ब्राजिलका वर्तमान राष्ट्रपति बोल्सोनारुले देशका जनताले लुलालाई फेरि उम्मेदवारका रूपमा हेर्न नचाहेको बताएको छ ।
तर आईपीईसीले आइतबार गरेको एक सर्वेक्षणले बोल्सोनारुले भन्दा सिल्भालाई जनताले बढी रुचाउने देखिएको छ ।
प्रतिक्रिया दिनुहोस !
