मुम्बई : फिल्म ‘चेहरे’को घोषणा हुँदा अभिनेत्री रिया चक्रवर्ती यसको मुख्य भूमिकामा थिइन्। अहिले फिल्म रिलिजका लागि तयार छ तर उनको भूमिकाबारे केही खुलाइएको छैन। फिल्मबाट उनको कुनै लुक्स पनि सार्वजनिक गरिएको छैन। फिल्मको पोस्टर र टिजरमा रिया गायब छिन्।
अहिले फिल्ममा रिया नै नरहेको चर्चा चल्न थालेको छ। निर्माता आनन्द पण्डितले भने, ‘हामीले रियाका बारेमा केही पनि नबोल्ने फैसला गरेका छौं। रिया फिल्म भए नभएको रिलिजपछि मात्रै थाहा हुनेछ।’
सुशान्त सिंह राजपुतको मृत्युअघि फिल्म ‘चेहरे’मा रियाको भूमिका र नामलाई लिएर निकै चर्चा भएको थियो। सन् २०१९ मा रिया आफैंले यो फिल्ममा आफ्नो लुक सोसल मिडियामा पोस्ट् गरेकी थिइन्। तर, हालै रिलिज भएको फिल्मको टिजर र पोस्टरमा रियाको अनुहार गायब छ। क्राइम थ्रिलर फिल्म ‘चेहरे’को निर्देशन रुमी जाफरीले गरेका छन्। यसमा इमरान हासमी पहिलो पटक अमिताभ बच्चनसँग देखिँदै छन्। अनु कपुर र क्रिस्टल डिसुजा पनि फिल्ममा छन्।
फिल्म ३० अप्रिलमा रिलिज हुँदै छ। रिया एक समय दिवंगत अभिनेता सुशान्त सिंह राजपुतसँगको सम्बन्धका कारण चर्चामा थिइन्। सुशान्तको मृत्युपछि उनले आफ्नो सम्बन्ध स्वीकारेकी थिइन्।
प्रतिक्रिया दिनुहोस !
