नयाँदिल्ली : भारतमा कोरोना भाइरसबाट एकैदिनमा झण्डै ४४ हजार संक्रमित थपिएका छन् । सरकारी अधिकारीहरुले जानाएअनुसार पछिल्लो २४ घण्टामा भारतमा थप ४३ हजार ८४६ जना कोरोना भाइरसबाट संक्रमित भएका हुन् ।
सोही अवधिमा अरु २२ हजार ९५६ जना भने संक्रमणमुक्त भएका छन् । संक्रमणमुक्त भएकाहरुको संख्याभन्दा संक्रमितहरुको संख्या झण्डै दोब्बर रहेकाले संक्रमित अवस्थामै रहेकाहरुको कुल संख्यामा बृद्धि हुँदै गएको छ ।
भारतमा अहिले कुल संक्रमितको संख्या एक करोड १५ लाख ९९ हजार १३० पुगेको अधिकारीहरुले जनाएका छन् ।
कोरोना भाइरसबाट संक्रमित भएर मृत्यु भएकाहरुको संख्या भारतमा एक लाख ५९ हजार ७५५ पुगेको केन्द्रीय स्वास्थ्य तथा परिवार कल्याण मन्त्रालयले जनाएको छ ।
मन्त्रालयकाअनुसार ती मध्ये १९७ जनाको पछिल्लो २४ घण्टामा मृत्यु भएको हो । सोही अवधिमा पन्जाबमा मात्रै एक हजार ५२९ जना संक्रमित भएका छन् ।
भारतमा अहिलेसम्म चार करोड ४६ लाख ३ हजार ८४१ खोप लगाइएको छ । शनिबारसम्म देशभरी २३ करोड ३५ लाख ६५ हजार ११९ जनाको कोरोना परीक्षण गरिएको छ ।
प्रतिक्रिया दिनुहोस !
