अमेरिकाको कोलोराडोमा बन्दुकधारीको आक्रमण, प्रहरी अधिकारीसहित १० जनाको मृत्यु
डेनभर : अमेरिकाको कोलोराडो राज्यमा बन्दुकधारीले अन्धाधुन्द गोली चलाउँदा एक प्रहरी अधिकारीसहित १० जनाको मृत्यु भएको छ । अमेरिकी प्रहरीका अनुसार ‘ग्रोसरी’ बजारमा एक बन्दुकधारीले आक्रमण गर्दा १० जनाको मृत्यु भएको हो ।
सो घटना स्थानीय समयअनुसार सोमबार दिउँसो साढे दुई बजे घटेको हो । प्रत्यक्षदर्शीले सो घटनाको युट्युबमा प्रत्यक्ष प्रसारण गरेको बताइएको छ । त्यसको करिब आधा घण्टापछि प्रहरीले किंग सूपर्स गल्लीमा गोली चलेको बताएको थियो । साथै कुनै पनि सामाजिक सञ्जालमा घटनाको प्रसारण नगर्न बताएको थियो ।
प्रहरीले एक जनालाई आक्रमण गरेको आशंकामा नियन्त्रण लिएको बताइएको छ ।
पछिल्लो समय अमेरिकामा बन्दुक आक्रमणका घटना बढिरहेका छन् । केही दिन पहिले मात्र तीन वटा मसाज सेन्टरमा आाक्रमण हुँदा छ एसियाली मुलका महिलासहित आठ जनाको ज्यान गएको थियो ।