अमेरिका गोलीकाण्ड: प्रहरी अधिकारीसहित १० जना मारिए
वासिङटन: अमेरिकाको कोलोराडो राज्यको बोल्डर सहरस्थित एक सुपरमार्केटमा भएको गोलीकाण्डमा प्रहरी अधिकारीसहित १० व्यक्ति मारिएका छन् ।
किङ सुपर्स सुपरमार्केटमा एक व्यक्तिले अन्धाधुन्ध गोली प्रहार गर्दा एक प्रहरी अधिकारी सहित १० जना मारिएका हुन् ।
घटनास्थलबाट एक शंकास्पद व्यक्तिलाई प्रहरीले नियन्त्रणमा लिइ अनुसन्धान गरिरहेको जनाएको छ । स्थानीयहरुले उक्त घटनाको सामाजिक सञ्जालमा लाइभ स्ट्रिमीङ गरेका थिए । जहाँ एक व्यक्ति रगताम्य भएर हिँडिरहेको अवस्थामा प्रहरीले उनलाई पक्राउ गरेको देखिन्छ । साथै ती व्यक्ति अर्धनग्न अवस्थामा पनि थिए ।
एक व्यक्तिले अन्धाधुन्ध गोली प्रहार गर्न थालेपछि त्यहाँ भागदौड मच्चिएको देखिन्छ । बोल्डर सहरका प्रहरी प्रमुख म्यारिस हेरोल्डले एक शंकास्पद व्यक्तिलाई हिरासतमा राखिएको र उनको उपचार भइरहेको जानकारी दिएका छन् ।
बीबीसीका अनुसार स्थानीय समयानुसार दिउँसो २:३० बजेतिर उक्त घटना भएको हो। अमेरिकाका विभिन्न सहरमा यसअघि पनि सशस्त्र व्यक्तिले भीडभाडमा छिरेर अन्धाधुन्ध गोली चलाउँदा थुप्रैको ज्यान गएको छ ।
गत महिना राष्ट्रपति जो बाइडेनले हतियार खरिद गर्न चाहने व्यक्तिको पृष्ठभूमिबारे कडा जाँच गर्ने कानुन ल्याउन सिफारिस गर्ने बताएका थिए।