लमजुङ : चितुवाको छालासहित लमजुङ प्रहरीले एक युवालाई पक्राउ गरेको छ । पक्राउ पर्नेमा लमजुङको दोर्दी गाउँपालिका वडा नं ६ सिमि बस्ने ३४ वर्षीय मनराज गुरुङ रहेका छन् ।
विशेष सूचनाको आधारमा पक्राउ गरिएको प्रहरीले जनाएको छ । जिल्ला प्रहरी कार्यालयका प्रवक्ता तथा इन्सपेक्टर ओमप्रकाश पुनका अनुसार केही हप्ता अगाडी देखि प्रहरी आफू नै ग्राहक बनेर गुरुङलाई पक्राउ गर्ने योजना बनाएको थियो ।
सोही योजना अनुरुप दोर्दीको सिमि गाउँमा नक्कली ग्राहक बनेर खरिद बन्ने योजना बनाई चितुवाको छाला र हड्डीसहित गुरुङलाई पक्राउ गरिएको पुनले बताए । गुरुङलाई आवश्यक कारवाही एवं थप अनुसन्धानको लागि डिभिजन बन कार्यालय लमजुङमा पठाइएको प्रहरीले जनाएको छ ।
वन्यजन्तुको अवैध कारोवारमा संलग्नलाई राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम कारवाही हुने डिभिजन बन कार्यालय लमजुङका प्रमुख पूर्णेश्वर सुवेदीले बताए ।
चितुवा मार्ने तथा बिक्रीवितरण गर्नेलाई पाँच लाख देखि १० लाख रुपैयाँ सम्म जरिवाना वा पाँच वर्षदेखि पन्ध्र वर्ष कैद वा दुवै सजाय हुने कानुमा उल्लेख छ । यस्तै अन्य संरक्षित वन्यजन्तु मार्ने वा घाइते बनाउनेलाई पनि कडा कारबाही हुन्छ ।
प्रतिक्रिया दिनुहोस !
