इजिप्टमा रेल दुर्घटना: ३२ को मृत्यु, एक सय बढी घाइते
कायरो: इजिप्टको दक्षिणी क्षेत्र सोहाग प्रदेशमा शुक्रबार रेल दुर्घटना हुँदा कम्तिमा ३२ जनाको मृत्यु भएको छ । १०८ जना घाइते भएका छन् ।
केही घाइतेको अवस्था गम्भीर भएको बताइएको छ । मृतकको संख्या अझै बढ्नसक्ने बुझिएको छ ।
राजधानी कायरोबाट अस्वानतर्फ गुडेको र लुक्सोरबाट अलेक्सान्ड्र्यातर्फ जाँदै गरेको दुई रेल आपसमा ठोक्किएर दुर्घटना भएको अन्तर्राष्ट्रिय मिडियाले जनाएका छन् । स्थानीय मिडियाका अनुसार घटनास्थल कायरोबाट ४७६ किमी टाढा पर्छ ।
स्वास्थ्य मन्त्रालयले वक्तव्य जारी गर्दै घटनाबारे जानकारी दिएको छ । सरकारले घटनाप्रति दुख व्यक्त गरेको छ । घटनाबारे अनुसन्धान गर्न सरकारले प्राविधिक समिति बनाएको पनि मन्त्रालयले जारी गरेको वक्तव्यमा जनाइएको छ ।
घटनास्थलमा उद्धारका लागि कठिनाइ भएको पनि बताइएको छ । जहाँ उद्धारका लागि ३६ एम्बुलेन्स परिचालन गरिएको थियो । दुबै रेलमा गरी सयौँ यात्रु सवार थिए ।
घाइतेहरूको अहिले नजिकका विभिन्न अस्पतालमा उपचार गराइएको छ । यस घटनालाई इजिप्टका नागरिकहरुले सामाजिक सञ्जालमार्फत् भयानक दुर्घटनाको रुपमा चित्रित गरेका छन् । यात्रु र स्थानीयहरुले सामाजिक सञ्जालमा दुर्घटनास्थलको फोटो र भिडियो सार्वजनिक गरिरहेका छन् । कतिपयले त यसलाई लिएर आगामी दिनमा रेलको यात्रा गर्न असुरक्षा महसुश हुने प्रतिक्रिया दिएका छन् ।