लण्डनस्थित म्यानमारका राजदूतलाई सेनाविरुद्ध बोलेको भन्दै दूतावासमै छिर्न दिइएन

लण्डन: बेलायतका लागि म्यानमारका राजदूत क्या ज्वार मिनले सैनिक शासनविरुद्ध अभिव्यक्ति दिएको भन्दै उनलाई दूतावासमै छिर्न दिइएको छैन ।

लण्डनस्थित दूतावासको कार्यालयमा उनका आफ्नै कार्यवाहक र सुरक्षाकर्मीले उनलाई प्रवेश निषेध गरेका हुन् । गत महिना मात्रै राजदूत मिनले म्यानमारमा हिरासतमा राखिएकी प्रजातन्त्रवादी नेत्री आन सान सू चीको रिहाइको माग गरेका थिए ।

राजदूतले बुधबार आफूलाई कार्यालयमा प्रवेश निषेध गरेपछि रोयटर्स लगायत मिडियालाई यसबारे जानकारी गराएका छन् । स्रोतका अनुसार उनका कार्यवाहकले कार्यालयको कामकाज सम्हालेका छन् ।

गत फेब्रुअरीमा म्यानमारमा सेनाले कू गरेपछि कूको विरुद्धमा निरन्तर प्रदर्शन हुँदैआएको छ । साथै नेत्री आन सान सू चीलाई हिरासतमै राखिएको छ ।

बेलायतका लागि म्यानमारका राजदूत मिनको भने पछिल्लो केही सातादेखि सेनासँग सम्बन्ध टाढिएको बताइएको छ ।

'मलाई प्रतिबन्ध लगाइएको छ । यो पनि मध्य लण्डनमा एक किसिमको कू नै हो । तपाईँ देख्न सक्नुहुन्छ कि उनीहरुले मेरो कार्यालय कब्जा गरेका छन्,' राजदूत क्या ज्वार मिनले भनेका छन् ।

उनले यस अवस्थाबारे बेलायतको विदेश मन्त्रालयसँग कुरा राख्ने बताएका छन् । अन्तर्राष्ट्रिय मिडियाका अनुसार कार्यवाहक राजदूत चित विन र सुरक्षाकर्मीको राजदूतलाई कार्यालय बाहिरै बन्द गरिदिएका हुन् ।

राजदूत मिनले भने दूतावास बाहिर सडकमा प्रदर्शनकारीहरुलाई सम्बोधन समेत गरेका छन् । राजदूत मिनका अनुसार लण्डनस्थित दूतावास बाहिर म्यानमारको सेनाको विरोध गर्दै प्रदर्शन भइरहेको छ ।

राजदूत मिनले भनेका छन् 'यो मेरो कार्यालय हो । म भित्र प्रवेश गर्न पाउनुपर्छ । यसैले म यहाँ पर्खिरहेको छु ।'

म्यानमारमा सेनाले कू गरेपछि बेलायत सरकारले म्यानमारका सैनिक अधिकारीहरुलाई प्रतिबन्ध लगाएको छ । साथै बेलायतले यसअघि नै म्यानमार सेनाको आलोचना गरिसकेको छ ।