पाकिस्तानी सांसद टोली बोकेर अफगानिस्तान गएको विमान असुरक्षाका कारण फर्कियो

इस्लामाबाद: पाकिस्तानी संसदका सभामुखसहित सांसदहरुको टोली बोकेर अफगानिस्तानका लागि उडेको जहाज विमानस्थल नजिकै विस्फोटक पदार्थ भएको भन्दै अवतरणको अनुमति नपाएपछि फिर्ता भएको छ ।

विमानस्थल नजिकै एक वर्ष पुरानो विस्फोटक पदार्थ भएकाले उक्त जहाजलाई फिर्ता गरिएको हो । पाकिस्तानी राष्ट्रियसभाका सभामुख असद कुरैसीको नेतृत्वमा ९ जना सांसदहरुको प्रतिनिधिमण्डल अफगानिस्तानको राजधानी  काबुलमा तीनदिने भ्रमणका लागि गएको थियो । जुन भ्रमण अफगान सभामुख वोलेसी जिर्गा मीर रहमान रहमानीको विशेष निमन्त्रणामा तय गरिएको थियो ।

सांसदहरुको टोली इस्लामाबाद अन्तर्राष्ट्रिय विमानस्थलबाट छुटेपछि काबुल अवतरण गर्नुअघि नै अफगानिस्तानका सभामुखले विमानस्थलमा सुरक्षा खतरा रहेकाले विमानस्थल बन्द रहेको सूचना अफगानिस्तानबाट आएको पाकिस्तानी समाचार संस्था डनले जनाएको छ ।

पाकिस्तानी अधिकारीका अनुसार सूचना आएपछि उक्त विमान अफगानिस्तानमा अवतरण नगरिकनै मोडिएको थियो । तर विस्फोटक पदार्थ विमानस्थलको धावन मार्गमा नभएर केही पर रहेको बताइएको छ ।

पाकिस्तानी टोली फर्किएपछि भने अफगान उच्च अधिकारीहरुले उनीहरुलाई टेलिफोन गरेका थिए । टेलिफोनको क्रममा अफगान अधिकारीले सुरक्षा खतराका कारण पाकिस्तानी विमान अवतरण गराउन नसकेको जानकारी दिएका थिए । साथै उनीहरुले पाकिस्तानी टोलीलाई फेरि छिट्टै भ्रमण हुने बताएका थिए । अफगानिस्तानमा पाकिस्तानी सभामुखको यो पहिलो औपचारिक भ्रमण थियो ।