सुर्खेत : कर्णालीमा तीन मन्त्रीको राजीनामा स्वीकृत भएको छ । प्रदेश सरकारमा सहभागी एमालेका तीन मन्त्रीले मंगलबार सामूहिक राजीनामा दिएका थिए । मुख्यमन्त्री महेन्द्रबहादुर शाहीले शुक्रबार उनीहरुको राजीनामा स्वीकृत गरेका हुन् ।
एमालेबाट प्रदेश सरकारमा सहभागि आर्थिक मामिला तथा योजनामन्त्री प्रकाश ज्वाला, सामाजिक विकासमन्त्री दल रावल र उद्योग, पर्यटन, वन तथा वातावरणमन्त्री नन्दसिंह बुढाले राजीनामा दिएका थिए । तीनै जना मन्त्रीको राजीनामा स्वीकृत भएको मुख्यमन्त्री तथा मन्त्रीपरिषद्को कार्यालयले जनाएको छ । साथै रिक्त रहेका मन्त्रालयमा जिम्मेवारीसमेत तोकिएको छ ।
मुख्यमन्त्री कार्यालयका अनुसार रिक्त भएको उद्योग, पर्यटन, वन तथा वातावरण मन्त्रालयको जिम्मेवारी मुख्यमन्त्री शाहीले आन्तरिक मामिला तथा कानुन मन्त्री नरेश भण्डारीलाई दिएका छन् । यस्तै आर्थिक मामिला तथा योजना मन्त्रालय र सामाजिक विकास मन्त्रालयको जिम्मेवारी भूमि व्यवस्था, कृषि तथा सहकारी मन्त्री विमला केसीलाई तोकिएको मुख्यमन्त्रीका प्रेस सल्लाहकार ध्रुवविक्रम बुढाथोकीले जानकारी दिए । प्रदेश सरकारमा एमालेका चार मन्त्री सहभागि थिए । एमालेका तर्फबाट भौतिक पूर्वाधार विकास मन्त्री बनेका खड्कबहादुर खत्री बैंकिक कसुरमा मुछिएपछि यसअघि नै बर्खास्त भएका थिए। त्यसयता भौतिक मन्त्रालयको जिम्मेवारी मुख्यमन्त्री शाही आफैले सम्हाल्दै आएका छन् ।
एमाले सरकारबाट बाहिरिएपछि सरकारमा माओवादी केन्द्र एक्लै बनेको छ । मुख्यमन्त्रीसहित तीन मन्त्रीले सरकारको नेतृत्व गरिरहेका छन् । एमाले सरकारबाट बाहिरिएपछि मुख्यमन्त्री शाही अल्पमतमा परेका छन् । सर्वोच्च अदालतले एमाले र माओवादीबिचको एकता भंगगरी पुरानै हैसियतमा रहेको फैसला गरेपछि कर्णालीमा एमालेले आफ्नै नेतृत्वमा सरकार गठनको कसरत थालेको छ । यसअघि दुई पार्टी एकता हुँदा कर्णालीमा सरकारको नेतृत्व माओवादीको भागमा परेको थियो ।
यद्यपी त्यसबेला पनि एमालेभित्र सरकारको नेतृत्व माओवादीलाई दिन नहुने अडान कायमै थियो । तर केन्द्रको दबावपछि एमाले सरकारको नेतृत्व छाड्न बाध्य भएको थियो । अदालतले नै एमाले र माओवादीलाई पुरानै हैसियतमा फर्काएपछि कर्णालीमा एमालेले आफ्नै नेतृत्वमा सरकार गठन गर्ने कसरत थालेको हो ।
चैत ४ मा एमाले संसदीय दलले सरकारलाई दिएको समर्थन फिर्ता लिए पनि बरिष्ठ नेता माधवकुमार नेपाल पक्षले समर्थन कायमै रहेको जनाउँदै आएको थियो । तर पछिल्लो समय नेता नेपाल पक्षले पनि प्रदेशमा एमालेकै नेतृत्वमा सरकार गठनका लागि पछाडि हटेको जनाएको छ ।
केन्द्रमा एमालेभित्र दुई धार देखिए पनि कर्णालीमा भने आफ्नै नेतृत्वमा सरकार गठन गर्न एमाले एक ठाउँमा उभिएको हो । आफ्नै नेतृत्वमा सरकार गठन गर्न भन्दै एमाले सरकारबाट बाहिरिएको छ । कर्णालीमा प्रदेश सभामा ४० सदस्य छन् । जसमा एमालेका सभामुखसहित २० जना सांसद छन् । माओवादी केन्द्रका १३ सांसद भए पनि धर्मराज रेग्मी एमालेमा प्रवेश गरेपछि माओवादीले उनलाई कारबाही गरिसकेको छ । यस्तै काँग्रेसका ६ र राप्रपाका १ जना सांसद छन् ।
प्रतिक्रिया दिनुहोस !
