कायरो: इजिप्टमा ३ हजार वर्ष पुरानो सबैभन्दा ठूलो प्राचिन सहर पत्ता लागेको पूरातत्वविद्हरुले जनाएका छन् ।
मिडियाकर्मीहरुले भ्रमण गर्ने क्रममा लक्सर नजिकै राजाहरुको पौराणिक सहरमा पशु र मानवका गतिविधि चिनिने अवशेष भेटिएको बताइएको छ ।
प्रख्यात इजिप्टोलोजिस्ट जाही हवासका अनुसार यो हराएको एउटा विशाल सहर थियो । जुन भगवान एटोन र एमेनहोटेप तृत्तीयसँग सम्बन्धित थियो । 'हामीले तीन मुख्य जिल्ला भेट्यौँ । तीमध्ये एक प्रशासनका लागि थियो । एउटा कामदारलाई सुत्नका लागि थियो र अर्को उद्योगका लागि थियो' जाही हावासले भनेका छन् ।
उक्त सहरमा मासु सुकाउने, कपडा र चप्पल बनाउने साथै माला र साना मूर्ति बनाउने ठाउँ पनि भेटिएको बताइन्छ । उक्त सहर चिनाउने केही पर्खालहरु भेटिएको बताइएको छ । तर भवनहरुमा मात्रै उक्त सहर सिमित नरहेको बताउँछन् सर्वोच्च काउन्सिलस्थित पुरातत्व विभागका प्रमुख मोस्तफा वाजिरी । उनका अनुसार आर्थिक गतिविधि, काम गर्ने ठाउँ र आगो बाल्ने ठाउँ अहिले पनि भेटिएका छन् ।
यही साताको सुरुमा हवासले हवासले 'हराएको सुनोलो सहर' पत्ता लागेको घोषणा गरेका थिए । र पूरातत्वविद्को टोलीले उक्त सहर इजिप्टमा हालसम्म लुकेर रहेको सबैभन्दा विशाल प्राचिन सहर भएको दावी गरेको छ । साथै अहिले सहरको एक भाग मात्रै भेटिएको र उक्त सहर पश्चिम र उत्तरतर्फ फैलिएको बताइन्छ ।
पूरातत्वविदको टोलीले गत सेप्टेम्बरमा कायरोबाट ५०० किलोमिटर दक्षिणतर्फ लुक्सर नजिकै रामसेस तृत्तीय र एमेनहोटेप तृत्तीयका मन्दिरहरुको उत्खनन सुरु गरेको थियो ।
प्राचिन इतिहास अनुसार एमेनहोटेप तृत्तीयले आधुनिक इराकस्थित यूफ्रेट्स नदीदेखि सिरिया र सुडानसम्म फैलिएको साम्राज्य विरासतमा पाएका थिए । जो ईशापूर्व १३५४ मा बितेका थिए । जसले झण्डै ४ दशकसम्म शासन गरेका थिए ।
पूरातत्वविदहरुले उक्त सहरमा अमेनहोटेप तृत्तीयले प्रयोग गरेका सुनका गहना तथा विभिन्न मूर्ति र लकेटहरुका चिन्ह भेटिने बताएका थिए । जाही हवासका अनुसार यहाँ ठूलो सुनको माछा पूजा गरिएको हुनसक्ने बताएका छन् । यसवाहेक उक्त सहरबारे थप महत्वपूर्ण खुलासा हुनसक्ने भन्दै पूरातत्वविदहरुको टोली उत्साही बनेको छ ।
प्रतिक्रिया दिनुहोस !
