ललितपुर : आइतबार दिउँसो सैनिक मञ्च टुँडिखेलमा राष्ट्रपति, उपराष्ट्रपति, प्रधानमन्त्री, सभामुख, प्रधानन्यायाधीशसहित विशिष्ट व्यक्तित्वको उपस्थितिमा घोडोजात्रा मनाइएको छ । उता ललितपुर पाटनमा भने सूर्यमान महर्जनले छुट्टै घोडेजात्रा मनाएका छन् ।
सूर्यमानले एक्लै घोडा कुदाएर जात्रा मनाएका हुन् । घोडालाई पूजा गरेर उनले बल्खुटोलबाट जात्रा सुरु गरेका थिए । उनी त्यहाँबाट पाटनका भित्री गल्लीको परिक्रमा गरेर भोलढोका पुगे । भोलढोकाबाट बालकुमारीसम्म पटकपटक घोडा कुदाएका उनले स्थानीयले पान खुवाएपछि घोडेजात्रा समापन गरेका हुन् ।
उनले यस पटक नेपाली सेनाको घोडा प्रयोग गरेर पाटनमा जात्रा मनाएका हुन् । विगतका वर्षमा भने घरमे पालेको घोडालाई जात्रामा प्रयोग गरिदै आएको थियो । पाटनमा एक जनाले घोडा चढेर जात्रा मनाउने पुरानो प्रचलन हो ।
सूर्यमान घोडामा चढेर घोडेजात्रामा सहभागी हुँदै गर्दा पाटन क्षेत्रका बालबालिका घोडाको अगाडि र पछाडि दौडिरहेका देखिन्थे । उनले आफूसँगै दौडिने र आफूलाई रोचकताका साथ हेर्ने सर्वसाधारणलाई हात हल्लाएर अभिवादन गरेका थिए । 
प्रतिक्रिया दिनुहोस !
