परासी : पश्चिम नवलपरासीमा कोरोना संक्रमणको जोखिम बढ्दो छ । भारतको उत्तर प्रदेश र बिहार राज्यसँग सीमा जोडिएका कारण पनि जिल्लामा संक्रमणको जोखिम बढ्दो देखिएको हो ।
सीमा क्षेत्रका मुख्य नाकाबाट आवतजावत गर्न नदिए पनि सुरक्षाकर्मीले नै वैकल्पिक बाटो प्रयोग गरेर आवतजावत गर्नेहरुलाई छाडिदिदा जोखिम झन बढ्दो देखिएको हो । दोस्रो चरणको कोरोनाको प्रकोप बढि रहँदा यो जिल्लामा पनि संक्रमितको संख्या बढ्दो छ । हप्ता दिनको अवधिमा १५ जनामा संक्रमण देखिएको स्वास्थ्य कार्यालयका प्रमुख कृष्ण प्रसाद पोखरेलले बताए । यो क्रम दिनहुँ बढ्दो रहेको उनले बताए । दोस्रो चरणमा देखिएको संक्रमणका कारण दुईजनाको मृत्यु भएको पोखरेलले जानकारी दिए ।
पछिल्लो पटक शनिबार कोरोना संक्रमणका कारण रामग्राम नगरपालिका–३ की ७१ वर्षीया वृद्धाको मृत्यु भएको छ । मुटु र ब्लड प्रेसरकी बिमारी रहेकी ति वृद्धाको घरमै मृत्यु भएको थियो । मृत्युपछि गरिएको कोरोना परीक्षणमा उनको रिपोर्ट पोजेटिभ आएको थियो ।
उनको शवलाई स्वास्थ्य कार्यालय र नेपाली सेनाको टोलीले स्थानीय झरही खोलामा व्यवस्थपन गरेको थियो । यसअघि सुनवलका एक पुरुषको मृत्यु भएको थियो । पहिलो र दोस्रो चरणमा गरी कोरोना संक्रमणबाट ३५ जनाको मृत्यु भएको छ । भने संक्रमितको संख्या १४ सय ५८ पुगेको छ ।
शव व्यवस्थापनमा समस्या
स्थानीय निकायहरुले जग्गाको व्यवस्था गर्न नसक्दा शव व्यवस्थापनमा समस्या देखिएको छ । ७ स्थानीय तहहरुले अहिलेसम्म शव व्यवस्थापनका लागि जग्गा व्यवस्थापन गर्न सकेका छैनन् । जसका कारण होम क्वारेन्टाइनमा रहेका संक्रमितको मृत्यु भएपछि व्यवस्थापनमा लामो समय लाग्ने गरेको छ ।
शनिबार राति मृत्यु भएकी रामग्राम नगरपालिका–३ की ७१ वर्षीया वृद्धाको शव व्यवस्थापन १६ घण्टापछि मात्र भएको थियो । शव व्यवस्थापनका लागि उचित स्थानको खोजी नगर्दा खोला छेउ र जंगल क्षेत्रमा शव लैजाने क्रममा स्थानीयहरुले बिरोध गर्ने गरेका छन् ।
जसका कारण हतारमा शव व्यवस्थापन गर्नुपर्ने बाध्यता रहेको छ । यसैबीच जिल्लामा शव बहान नहुँदा मृत्यु भएका संक्रमितहरुलाई एम्बुलेन्समा राखेर लैजानु पर्ने अर्को बाध्यता छ ।
संक्रमितको संख्या बढ्दै गएपनि स्थानीय तहहरुले क्वारेन्टाइन र आइसोलेसन बनाउने तर्फ ध्यान दिएका छैनन् । प्रमुख जिल्ला अधिकारी धर्मेन्द मिश्रले आफू भर्खरै सरुवा भएर आएकाले केही दिनमा जग्गा व्यवस्थापन र आइसोलेसनका लागि स्थानीय तहका प्रमुखहरुसँग बसेर छलफल गर्ने बताए ।
प्रतिक्रिया दिनुहोस !
