पोखरा : सत्तारुढ दल नेपाल कम्युनिस्ट पार्टी एमालेले गण्डकी प्रदेशसभा बैठक अवरुद्ध गरेको छ । प्रदेशसभाको विशेष अधिवेशनको दोस्रो बैठकमा एमाले सांसदले सुरुआतमै उठेर आपत्ति जनाएका थिए ।
पीसीआर परीक्षण नगरी सामाजिक दूरी पनि कायम नगरी बैठक राखिएको भन्दै उनीहरुले आपत्ति जनाएका हुन् । बैठकमा एमाले सांसद राजीव पहारीले आफूहरु सबैको पीसीआर परीक्षण गरिनुपर्ने बताए ।
पीसीआर परीक्षण नगरी बैठक राख्दा हुन सक्ने क्षति प्रदेश सभाले नै व्यहोर्नुपर्ने उनको तर्क थियो । ‘धेरै माननीय पनि प्रेसर, सुगर, थाइराइडबाट ग्रस्त भएकाले संक्रमण छिटो हुन सक्ने छ । दूरी कायम नगरी बस्दा कसैको मृत्यु हुन गयो भने त्यसको जिम्मेवार को हुने?, ’ उनको प्रश्न थियो ।
सरकारले १५ जना भन्दा बढी भेला नहुन निर्देशन गरेका बेला प्रदेश सभामा सयौं जना राखेर बैठक राख्न नहुने उनको तर्क थियो । यसअघि सोमबारको बैठकमा एमाले संसदीय दलका प्रमुख सचेतक मायानाथ अधिकारीले पीसीआर परीक्षण गरेर मात्रै संसद राख्न ध्यानाकर्षण गराएका थिए ।
एमालेले सदन अवरुद्ध गरेपछि सभामुख नेत्रनाथ अधिकारीले २० मिनेटका लागि बैठक स्थगित गरेको छ । सोमबारको बैठकमा २५ सांसदले बोल्ने कार्यसूचि थियो । वैशाख २ गते प्रदेशसभामा मुख्यमन्त्री पृथ्वीसुब्बा गुरुङविरुद्ध अविश्वास प्रस्ताव दर्ता भएको थियो । अविश्वास प्रस्तावमा बुधबार मतदान गर्ने योजना थियो । तर एमालेले बैठक अवरुद्ध गर्दा मतदान नहुने देखिन्छ ।
प्रतिक्रिया दिनुहोस !
