कैलाली र कञ्चनपुरमा कोरोनाबाट एकैदिन सातजनाको मृत्यु
वैशाख १६, २०७८ बिहीबार १५:१:०
धनगढी : धनगढीको सेती प्रादेशीक अस्पताल र कञ्चनपुरको महाकाली अस्पतालमा ६ जना र होमआइसोलेसनमा एकजना गरी ७ कोरोना बिरामीको मृत्यु भएको छ । पछिल्लो २४ घण्टामा सेतीमा तीनजना, महाकालीमा तीनजना र कैलालीको गोदावरीमा होम आइसोलेसनमा बसेका एकजना गरी सातजनाको मृत्यु भएको दुबै अस्पतालका सूचना अधिकारीले जनाएका छन ।
सेती प्रादेशिक अस्पतालमा उपचाररत धनगढी उपमहानगरपालिका–३ की ४५ वर्षीया महिला, अस्पतालको आइसीयूमा उपचारत कैलालीकी लम्कीचुहा–२ का ३३ वर्षीय पुरुष र घोडाघोडी–१० का ७० वर्षीय पुरुषको मृत्यु भएको अस्पतालका सूचना अधिकारी दिलीपकुमार श्रेष्ठले जानकारी दिए ।
लम्कीचुहा ३ का ३३ वर्षका पुरुष वैशाख १४ गते अस्पताल भर्ना भएका थिए । घोडाघोडी १० का ७० वर्षका पुरुषको भने अस्पताल भर्ना भएको १२ घण्टा नबित्नै मृत्यु भएको हो । उनलाई बैशाख १५ गते राती ११ बजे मात्रै सेतीको कोभिड अस्पतालमा भर्ना गरिएको अस्पतालका सूचना अधिकारी दिलिप श्रेष्ठले जानकारी दिए । दुबै जनाका कडा खालको निमोनिया देखिएको अस्पतालले जनाएको छ ।
यस्तै कैलालीको गोदावरी नगरपालिकाका ८७ बर्षीया महिलाको पनि होम आइसोलेसनमा मृत्यु भएको छ । १५ गते उनमा कोरोना संक्रमण पुष्टि भएको थियो । आइसोलेसनमा रहेका बेला उनको मृत्यु भएको जिल्ला प्रशासन कार्यालय कैलालीका सूचना अधिकारी शिवराज जोशीले जानकारी दिए ।
कञ्चनपुरको महाकाली अस्पतालमा उपचाररत ३ जना कोरोना संक्रमितको मृत्यु भएको छ । कञ्चनपुरको भीमदत्त नगरपालिका–१९ का २१ वर्षीय युवकको बिहिवार बिहान १ बजे, भिमदत्त १८ कि ३६ वर्षीय एक महिलाको बिहीबार बिहान ७ :३० बजे र दोधारा चाँदनी नगरपालिकाका ३० वर्षीय युवकको राति १२ :३० बजे मृत्यु भएको अस्पतालले जनाएको छ ।
महाकाली अस्पतालका कोरोना सम्पर्क व्यक्ति डा.गोविन्द रोकायाले भीमदत्त नगरपालिका–१९ का २१ वर्षीय युवकको कुनै पनि ट्राभल हिस्ट्री नभएकाले दोस्रो भेरियन्टको कोरोना समुदाय स्तरमा तिब्र रुपमा फैलिन थालेका बताए ।
दोधारा चाँदनी नगरपालिकाका ३० वर्षीय युवकलाई मंगलबार अस्पतालमा उपचारको लागी भर्ना गरिए पनि उनमा कडा खालको निमोनिया देखा परेको थियो । उनि भारतबाट आएको र भारतमै उनमा समस्या देखा परेको थियो ।
प्रतिक्रिया दिनुहोस !
