कोभिडका बिरामीले आईसीयू नपाउँदा अछामका आईसीयू र भेन्टिलेटर खियाले खायो

अछामः कैलाली र कञ्चनपुरमा कोरोनाका विरामी आईसीयू र भेन्टिलेटर नपाएर ज्यान गुमाइरहेका बेला अछामको जिल्ला अस्पतालमा जोडिएका दुई भेन्टिलेटर र आईसीयूका उपकरणमा खिया लाग्न थालेको छ ।

प्रदेश सरकार, प्रदेश स्वास्थ्य तथा आपूर्ति व्यवस्थापन केन्द्रले गत मंसिरमा जिल्ला अस्पताल अछामका जडान गरेका उक्त उपकरणहरु सञ्चालन गर्ने जनशक्ति नभएकाले खिया लाग्न थालेका हुन् ।

बुधवार मात्रै अछाममा २४ जनाको कोरोना परीक्षण गर्दा २३ जनामा संक्रमण पुष्टि भएको छ । बुधवार बान्नीगढी जयगढ गाउँपालिका–६ मा २१ जनामा परीक्षण गर्दा २० जनामा संक्रमण पुष्टि भएको हो । मंगलसेनमा एक र बयलपाटामा २ जनामा कोरोना पुष्टि भएको स्वास्थ्य कार्यालय अछामका कोभिड सम्पर्क व्यक्ति मिनबहादुर कुँवरले बताए । हाल अछाममा ६८ जना कोरोनाका सक्रिय संक्रमित छन् ।

अछाममा संक्रमितको उपचारमा समस्या देखिनुको कारण भेन्टिलेटर र आईसीयू समेत बनेका छन् । भेन्टिलेटर र आईसीयू सञ्चालनमा नआउँदा उपचारमा समस्या भएको अस्पतालले जनाएको छ । भेण्टिलेटर र आईसीयूका लागि अछाममा आएका उपकरण ४ महिनादेखि नै थन्किएका जिल्ला अस्पताल अछामका निमित्त प्रमुख डा अतुल भारद्धाजले बताए ।

उनले भने ‘अहिले लक्षण देखिएकालाई मात्र अस्पतालमा राखिएको छ, ६ जना अहिले उपचारत छन् । बाँकी लक्षण नदेखिएकालाई घरमै अथवा पालिकाले बनाएको आईशोलेशनमा राखिएको छ ।’

तर ६८ जना संक्रमित रहेको जिल्लामा गम्भीर प्रकृतिका विरामी आएमा रेफर गर्नुभन्दा अरु विकल्प नरहेको उनले बताए । ‘भेन्टिलेर र आईसीयू त छन् तर सञ्चालन गर्ने जनशक्ति छैन । भेन्टिलेटरका लागि एनेस्थेसियोलोजिष्ट र फिजिसियन चिकित्सक चाहिन्छ, ती दुबै जनशक्ति अछाममा छैनन्’ डा भारद्वाजले भने ।

उनले जिल्लामा सीजनको समेत अभाव रहेको बताए । अछाम जिल्लामा कोरोनाका मात्रै नभइ अन्य प्रकृतिका विरामीलाई पनि भेन्टिलेर र आईसीयूमा राखेर उपचार गर्नुपर्ने भएमा रेधनगढी वा नेपालगञ्ज रेफर गरिँदै आएको डा भारद्वाजले बताए ।

नगरपालिकाले अक्सिन सिलेन्डर किन्ने

साँफेबगर नगरपालिकाले कोरोना संक्रमितको उपचारका लागि अक्सिजन सिलिन्डर किन्ने जनाएको छ । नगरपालिकाको संकट व्यवस्थापन केन्द्रको बैठकले अस्पताललाई आवश्यक १० वटा अक्सिजन सिलिन्डर खरिद गर्ने निर्णय गरेको नगर प्रमुख कुल बहादुर कुँवरले बताए ।

न्याय हेल्थ नेपाल बयलपाटा अस्पतालका डा मन्दिप पाठकले एकै दिन १० देखि २० जना संक्रमित आए भने उपचार गर्ने अवस्था नभएको बताए । गाउँगाउँमा कोरोना फैलिसकेकोले स्थिति नियन्त्रण बाहिर जानसक्ने बताए ।

उनले भने ‘अस्पतालमा औषधिको अभाव छ, कोरोना संक्रमितहरुलाई दिइने औषधि समेत सकिएको छ ।’ बान्नीगढी जयगढ गाउँपालिकाको कालिका नन्दा माबिका १५ जना विद्यार्थी कोरोना संक्रमण देखिएपछि साँफेबगर नगरपालिका र चौरपाटी गाउँपालिकाले विद्यालय बन्द गर्ने निर्णय गरेका छन् ।

दुई पालिकाकाले बैशाख १६ गतेदेखि अर्को निर्णय नहुँदासम्म विद्यालय बन्द गर्ने निर्णय गरेका पालिकाले जनाएका छन् ।