परासी : नेत्र विक्रम चन्द (विप्लव) नेतृत्वको नेकपाका केन्द्रीय सदस्य चन्द्रबहादुर चन्द (विरजंग) शुक्रबार पश्चिम नवलपरासी जिल्ला अदालतबाट धरौटीमा छुटेका छन् ।
नवलपरासीको बर्दघाटस्थित धनेवामा रहेको एनसेल टावरमा बम विष्फोट गरेको आरोपमा उनलाई रुपन्देहीबाट २०७७ असोज २१ गते नवलपरासी ल्याइएको थियो । त्यतिबेला अदालतले उनलाई २५ हजार धरौटीमा रिहा गर्ने आदेश दिएको थियो ।
धरौटी नबुझाएपछि उनी कारागार चलान भएका थिए । पछि स्वास्थ्यमा समस्या आएपछि चन्द्रबहादुरलाई असोज २८ गते चितवन अस्पताल पठाइएको थियो । उनी त्यहीको कारागार थिए । चितवनबाट शुक्रबार नवलपरासी ल्याइएका उनले २५ हजार धरौटी बुझाएपछि अदालतले छाडेको हो ।
पहिलो पटक उनी २०७६ असोज ३० मा विप्लवका २१ जना नेता तथा कार्यकर्तासहित दाङबाट पक्राउ परेका थिए । त्यसबेला उनी विप्लव समुहको मध्यपश्चिम कमाण्डका इन्चार्ज थिए ।
कपिलवस्तु शिवराज नगरपालिका–९ शिवपुरगढी घर भएका चन्द्रबहादुर विप्लवका सहोदर जेठा दाजु हुन् । अहिलेसम्म विभिन्न ८ जिल्लामा अड्डा सारगर्दै कारागार पठाइएको चन्द्रबहादुरले बताए ।
यसैबीच रिहा भएपछि पत्रकारहरुसँग प्रतिकृया दिदैं चन्द्रबहादुरले पार्टीसँग भएको ३ बुँदे सहमति सरकारले कार्यान्वन नगरेको गुनासो गरे । ‘राजनीति निकासका लागि सहमति आवश्यक थियो तर अहिलेसम्म पनि मुद्दा फिर्ता र कार्यकर्ताहरुलाई नछाडेकाले सरकारले अपेक्षाकृत काम नगरेको अनुभुति भएको छ । ’ चन्द्रबहादुरले भने । सहमति कार्यान्वयन नभए देश फेरि अनेपेक्षित ढंगले अघि बढ्न सक्ने उनको भनाई थियो ।
प्रतिक्रिया दिनुहोस !
