अमेरिकालाई उत्तर कोरियाको चेतावनी: निकट भविष्यमा कडा संकट सामना गर्नुपर्नेछ !

सोल: उत्तर कोरियाले अमेरिकाले निकट भविष्यमा नियन्त्रण गर्नै नसक्ने संकटको सामना गर्नुपर्ने भन्दै चेतावनी दिएको छ ।

आइतबार श्रृंखलाबद्ध विज्ञप्ति जारी गर्दै उत्तर कोरियाले यस्तो चेतावनी दिएको हो । विज्ञप्तिमा भनिए अनुसार अमेरिकाले निकट भविष्यमा डरलाग्दो र नियन्त्रण गर्नै नसकिने संकट सामना गर्नुपर्ने बताइएको छ ।

अमेरिकी राष्ट्रपति जो बाइडेनले आफ्नो कार्यकालको १ सय दिन पूरा भएको सन्दर्भमा बिहीबार संसदलाई सम्बोधन गरेपछि उत्तर कोरियाको यस्तो चेतावनी आएको हो । बाइडेनले सम्बोधनको क्रममा उत्तर कोरियाको आणविक कार्यक्रमको आलोचना गरेका थिए ।

उत्तर कोरियाले भने बाइडेनको उक्त अभिव्यक्तिप्रति आपत्ती जनाउँदै अमेरिकी नीतिको विरोध गरेको छ । आइतबार जारी गरेका विज्ञप्तिमध्ये उत्तरले एउटामा जो बाइडेनको आलोचना गरेको छ ।

बाइडेनले अमेरिकी संसदलाई सम्बोधनको क्रममा उत्तर कोरियाको आणविक कार्यक्रमले अमेरिका र विश्वसामु खतरा उत्पन्न गरेको भन्दै त्यसको आलोचना गरेका थिए ।

उत्तर कोरियाले विज्ञप्तिमार्फत् दक्षिण कोरियालाई पनि कडा चेतावनी दिएको छ । दक्षिण कोरिया अमेरिकाको उक्साहटमा आफूविरुद्ध लागेको आरोप उत्तरले लगाउँदैआएको छ ।

अमेरिकाका पूर्वराष्ट्रपति डोनल्ड ट्रम्पको कार्यकालमा उत्तर कोरिया र अमेरिकाबीच वार्ताको पहल भए पनि सफल हुन सकेन । ट्रम्पको कार्यकालमा सुरु भएको संवाद ट्रम्पकै पालामा भंग भएको थियो । बाइडेनले उक्त संवादको श्रृंखलालाई निरन्तरता दिएलान् कि भन्ने अपेक्षा गरिए पनि बाइडेनको कार्यकालको प्रारम्भदेखि नै दुई देशबीच मनमुटाब पहिले झैँ देखिन थालेको छ ।