रोल्पा: रोल्पामा चट्याङमा परेर आइतबार साँझ २ महिनाको बच्चा सहित सात जना घाइते भएका छन् ।
परिवर्तन गाउँपालिका-६ बाबियाचौरका ७८ वर्षीय भीमबहादुर बुढामगरको घरमा परेको चट्याङले सातैजना घाइते भएका हुन् ।
घरमा जडान गरिएको बिजुलीको मिटर बक्समा चट्याङ पर्दा भीमबहादुरका एकाघरका पाँच र छिमेकी दुईजना घाइते भएको जिल्ला प्रहरी प्रमुख एवं प्रहरी नायव उपरीक्षक नरेशराज सुवेदीले जानकारी दिए ।
दुई वर्षका एक बालक, ३ वर्षका आयुष बुढामगर र १३ वर्षका पृथ्वी बुढामगरको अवस्था गम्भीर रहेको बताइएको छ । प्रनाउ सुवेदीका अनुसार घाईते ६ जनालाई उपचारका लागि रोल्पा अस्पताल रेउघा ल्याउँदैछन् ।
भिमबहादुरको अवस्था सामान्य रहेकाले गाउँमै छन् । पानी परिरहेको वेला घरमा ओत लाग्न गएका छिमेकी जुनमाया बुढामगर र आयुष पनि घाइते भएका हुन् । स्थानीयहरुका अनुसार साँझ ५:३० बजे चट्याङ परेको थियो।
बैशाख १६ र १७ मा पूर्वी र दक्षिणी रोल्पामा चट्याङमै परेर दुईजनाको मृत्यु भइसकेको छ । सुनछहरी गाउँपालिका-७ जेलबाङका ९ वर्षीय अभिषेक पुन र रुन्टिगढी गाउँपालिका-९ पलासेनीको १२ वर्षीया सुष्मा नेपालीको ज्यान गएको हो ।
प्रतिक्रिया दिनुहोस !
