नपिद्व: म्यानमारमा सैन्य कू पछिकै सबैभन्दा ठूलोमध्ये एक भनिएको आइतबारको जनप्रदर्शनमा सेनाले अन्धाधुन्ध गोली चलाएको छ । यस क्रममा सात प्रदर्शनकारी मारिएका छन् ।
स्थानीय मिडियाका अनुसार देशका ठूला सहरमा आइतबार दिनभर विशाल प्रदर्शन भएका थिए । विभिन्न ठाउँमा सेनाले प्रदर्शनकारीहरुलाई लक्षित गरी गोली प्रहार गरेको हो ।
व्यापारिक केन्द्र मानिएको यंगुन सहर र दोस्रो ठूलो सहर मन्डालयमा सेनाको गोली प्रहारबाट २ प्रदर्शनकारी मारिएका छन् । यस्तै वेटलेट सहरमा २ जना मारिएका छन् । एक जना पकान्त सहरमा मारिएको स्थानीय मिडियाले जनाएका छन् ।
म्यानमारमा सैन्य कू विरोधी प्रदर्शन व्यापक बन्दै जाँदा कतिपय स्थानमा प्रदर्शनको नेतृत्व बौद्ध भिक्षुहरुले गरेका छन् भने प्रदर्शनलाई 'विश्वव्यापी म्यानमार बसन्त क्रान्ति' नाम दिइएको छ ।
म्यानमारमा सेनाको अमानवीय र आततायी हमला रोक्न भन्दै नागरिकहरुले विदेशी समुदायसमक्ष अपील समेत गरेका छन् ।
म्यानमारमा निर्वाचित सरकार अपदस्त गर्दै गत फेब्रुअरी १ मा सेनाले शासन हत्याएपछि निरन्तर जनप्रदर्शन भएका छन् । सेनाले आन सान सू ची सहित अन्य थुप्रै नेताहरुलाई पक्राउ गरी संकटकाल समेत लगाएको छ । निर्वाचन गर्ने आश्वासन दिए पनि मिति तोकेको छैन र प्रतिपक्षीसँग संवादको कुनै संकेत देखाएको छैन ।
हालसम्म प्रदर्शनमा सेनाको प्रहारबाट ७ सय ५० भन्दा धेरै प्रदर्शनकारी मारिएका छन् । साथै हजारौँ मानिस थुनिएका छन् ।
म्यानमारमा वर्षौँदेखि युद्धरत सशस्त्र समूहहरुले पनि पछिल्लो समय सेनाविरोधी प्रदर्शनलाई नै साथ दिएका छन् । उनीहरुले कतिपय स्थानमा प्रहरी चौकीमाथि नै आक्रमण गरेका छन् ।
म्यानमारमा सेनाको कदमप्रति विदेशी समुदायले समेत आपत्ति जनाएका छन् । त्यहाँ सेनाले कारवाही रोक्नुपर्ने भन्दै अमेरिका, बेलायत लगायत देशहरुले विरोध जनाएका छन् ।
प्रतिक्रिया दिनुहोस !
