अछाम: अछाममा पनि कोरोनाको नयाँ लहर तिब्र रुपमा फैलिन थालेपछि सोमबारदेखि निषेधाज्ञा जारी गरिएको छ ।
जिल्ला प्रशासन कार्यालय अछामका अनुसार दुई हप्ताको लागि निषेधाज्ञा जारी गरेको हो । बैशाख २० गते राति १२ बजे देखि जेठ २ गते राति १२ बजेसम्म निषेधाज्ञा लागू हुने जिल्ला संकट व्यवस्थापन समितिको बैशाख १६ गते बसेको बैठकले निर्णय गरेको प्रमुख जिल्ला अधिकारी रुद्रबहादुर मल्लले जानकारी दिए ।
निषेधाज्ञाको समयमा अत्यावश्यक बाहेक सबै सवारी साधन बन्द रहने छन् । अत्यावश्यक सवारी साधन जस्तै एम्बुलेन्स, खाद्य तथा स्वास्थ्य सामग्री बोकेको सवारी साधन, दुग्जन्य पदार्थ बोकेको सवारी, बैंक तथा बित्तीय संस्थाका सवारी, दूरसञ्चार तथा इन्टरनेट र आइशोलेशनका सवारी स्पष्ट खुल्ने कागजातका आधारमा सञ्चालन हुने प्रजिअ मल्लले बताए ।
खाद्य सामग्रीका पसलहरु बिहान ५ बजेदेखि बिहान १० बजेसम्म मात्र खोल्न पाइनेछ । निषेधाज्ञा लागेपछि अति आवश्यक कामकाज बाहेक हिँडडुल गर्न पाइने छैन । सबै प्रकारका सभा सम्मेलन, गोष्ठी तथा भिडभाड हुने स्थान बन्द रहनेछन् ।
विवाह व्रतबन्धको हकमा जिल्ला प्रशासनबाट पूर्व स्वीकृति लिएर स्वास्थ्य मापदण्ड पालना गरी बढीमा १५ जनासम्म मात्रै भेला हुन पाउने बताइएको छ ।
यस्तै नेपाल सरकारका कर्मचारी, बैंक बित्तीय संस्था तथा अन्य अत्यावश्यक कार्यालयका कर्मचारीले कार्यालयले जारी गरेको परिचयपत्रका आधारमा आवतजावत गर्न पाउनेछन् । पत्रकारको हकमा भने सूचना विभागले जारी गरेको परिचयपत्रका आधारमा आवतजावत गर्न पाउने जनाएको छ ।
निषेधाज्ञा जारी गरेसँगै सरकारी कार्यालय समेत आकस्मिक बाहेका सबै सेवा बन्द छन् । जिल्लाका सबै स्थानीय तहले आकस्मिक बाहेका सबै सेवा बन्द गरेका छन् । जिल्लामा कोरोना संक्रमणको नयाँ लहर फैलिएपछि जिल्लामा सक्रमितको संख्या १८५ पुगेको स्वास्थ कार्यालयका कोभिड सम्पर्क व्यक्ति मिन कुँवरले जानकारी दिए । कोरोनाको दोस्रो लहर सुरु भएपछि ४ जनाको मृत्यु भइसकेको कुँवरले बताए । सबै भन्दा बढी बान्नीगढी जयगढ गाउँपालिकामा ६५ जना भन्दा बढी संक्रमित रहेका छन् ।
प्रतिक्रिया दिनुहोस !
