भक्तपुरमा कोरोना महामारीबाट दैनिकजसो मृत्यु, दुईदिनमा ११ जनाले गुमाए ज्यान

भक्तपुर : भक्तपुरमा कोरोना भाइरस संक्रमणको कारण दैनिक मृत्यु हुन थालेको छ । गएको एक हप्तादेखि यहाँ लगातार संक्रमितको मृत्यु हुन थालेको हो । स्वास्थ्य कार्यालय भक्तपुरका अनुसार बुधबार र बिहीबार क्रमशः ५ र ६ जना संक्रमितको मृत्यु भएको छ । मंगलबार भने अहिलेसम्मकै सबैभन्दा बढी ९ जनाको मृत्यु भएको थियो ।

यससँगै भक्तपुरका कोरोना भाइरस संक्रमणका कारण मर्नेको संख्या १७४ पुगेको कार्यालयका प्रमुख कृष्ण मिजारले जानकारी दिए । उनका अनुसार बिहीबार एकदिन ६ जना मृत्यु भएका संक्रमितमा मध्यपुर थिमि नपाका मात्रै ३ पुरुष र एकजना महिला गरी ४ जना रहेका छन् ।भक्तपुर र चाँगुनारायण नपाका एकएकजना महिला संक्रमितको मृत्यु भएको उनको भनाइ छ ।

भक्तपुरका चार नपामध्ये सबैभन्दा बढी मध्यपुर थिमि नपाका ४४ जना पुरुष र १८ महिला गरी ६२ जना संक्रमितको मृत्यु भएको छ । भक्तपुर नपाका ३२ पुरुष र २१ महिलार गरी ५३ जना, सूर्यविनायक नपाका २६ पुरुष र १७ महिला गरी ४३ जना संक्रमितले ज्यान गुमाएका छन् । त्यस्तै चाँगुनारायण नपाका १० पुरुष र ६ महिला गरी १६ जनाको मृत्यु भएको स्वास्थ्य कार्यालयको तथ्यांक रहेको छ ।

भक्तपुरमा सक्रिय संक्रमित भने ४ हजार ५ सय ५५ जना रहेका छन् । जसअनुसार सबैभन्दा बढी मध्यपुर थिमि नपमा ७९२ पुरुष र ७६६ महिला गरी एकहजार ५ सय ५८ जना सक्रिय संक्रमित रहेका छन् । मध्यपुर थिमिपछि सूर्यविनायक नपामा ६५२ जना पुरुष र ५५४ जना महिला गरी एकहजार २ सय ६ जना सक्रिय संक्रमित रहेका छन् । त्यस्तै भक्तपुर नपामा ४३० जना पुरुष र ४२३ जना महिला गरी ८५३ र चाँगुनारायण नपामा २९६ जना पुरुष र २१६ महिला गरी ५१२ जना सक्रिय संक्रमित रहेका छन् ।

कूल सक्रिय संक्रमितमध्ये १५८ पुरुष र १४१ महिला गरी २९९ जना अर्थात ६.५६ प्रतिशत अस्पताल तथा नपाको आइसोलेसनमा रहेको स्वास्थ्य कार्यालयले जनाएको छ । ९३.४४ प्रतिशत अर्थात २ हजार २ सय ५१ पुरुष र २ हजार ५ महिला री ४ हजार २ सय ५६ जना होम आइसोलेसनमा रहेको कार्यालय प्रमुख मिजार बताउँछन् ।

भक्तपुरमा अहिलेसम्म कोरोना संक्रमितको संख्या १५ हजार ७ सय १६ पुगेको छ । जसअनुसार ८ हजार ६ सय ८९ पुरुष र ७ हजार २७ महिला रहेका छन् । त्यस्तै ६ हजार एक सय ६८ पुरुष र ४ हजार ८ सय १९ महिला गरी १० हजार ९ सय ८७ जना अर्थात ६९.९० प्रतिशत संक्रमित डिस्चार्ज भएका छन् ।